ਆਕਲੈਂਡ (NZ Punjabi News) – ਆਕਲੈਂਡ ਵਿੱਚ ਰਹਿੰਦੇ 36 ਸਾਲਾ ਐਡਵਰਡ ਗੋਂਸਾਲਵੇਸ ਦੀ ਅਚਾਨਕ ਮੈਡੀਕਲ ਐਮਰਜੈਂਸੀ ਤੋਂ ਬਾਅਦ ਮੌਤ ਹੋ ਜਾਣ ਕਾਰਨ ਉਸਦਾ ਪਰਿਵਾਰ ਅਤੇ ਦੋਸਤ ਡੂੰਘੇ ਸਦਮੇ ਵਿੱਚ ਹਨ। ਪਤਨੀ ਸੇਰੀਨਾ ਡੀਸੂਜ਼ਾ ਨੇ ਆਪਣੇ ਪਤੀ ਨੂੰ ਯਾਦ ਕਰਦਿਆਂ ਕਿਹਾ ਕਿ ਉਹ ਬਹੁਤ ਰੋਮਾਂਟਿਕ ਅਤੇ ਮਿਲਣਸਾਰ ਇਨਸਾਨ ਸੀ।
ਪਰਿਵਾਰ ਮੁਤਾਬਕ ਐਡਵਰਡ ਨੂੰ ਸ਼ਨੀਵਾਰ ਸ਼ਾਮ ਦਿਮਾਗੀ ਦੌਰਾ (ਬ੍ਰੇਨ ਸਟ੍ਰੋਕ) ਪਿਆ, ਜਿਸ ਤੋਂ ਬਾਅਦ ਉਹ ਬੇਹੋਸ਼ ਹੋ ਗਿਆ। ਐਮਰਜੈਂਸੀ ਸੇਵਾਵਾਂ ਨੇ ਮੌਕੇ ‘ਤੇ ਪਹੁੰਚ ਕੇ ਉਸਨੂੰ ਸੀਪੀਆਰ ਦਿੱਤੀ ਅਤੇ ਹਸਪਤਾਲ ਲਿਜਾਇਆ ਗਿਆ। ਆਕਲੈਂਡ ਹਸਪਤਾਲ ਵਿੱਚ ਉਸਦੀ ਸਰਜਰੀ ਕੀਤੀ ਗਈ ਅਤੇ ਉਸਨੂੰ ਵੈਂਟੀਲੇਟਰ ‘ਤੇ ਰੱਖਿਆ ਗਿਆ। ਕਰੀਬ ਸਾਢੇ ਤਿੰਨ ਦਿਨ ਬਾਅਦ ਡਾਕਟਰਾਂ ਨੇ ਉਸਨੂੰ ਬ੍ਰੇਨ ਡੈੱਡ ਐਲਾਨ ਦਿੱਤਾ।
ਐਡਵਰਡ ਦੇ ਕਰੀਬੀ ਦੋਸਤ ਅਨਿਰੁੱਧ ਨੇ ਦੱਸਿਆ ਕਿ ਡਾਕਟਰਾਂ ਨੇ ਹਰ ਸੰਭਵ ਕੋਸ਼ਿਸ਼ ਕੀਤੀ, ਪਰ ਉਸਦੇ ਦਿਮਾਗ ਵੱਲੋਂ ਕੋਈ ਪ੍ਰਤੀਕਿਰਿਆ ਨਹੀਂ ਮਿਲੀ। ਦੋਸਤਾਂ ਅਤੇ ਪਰਿਵਾਰਕ ਮੈਂਬਰਾਂ ਨੇ ਐਡਵਰਡ ਨੂੰ ਇੱਕ ਹੱਸਮੁੱਖ, ਮਦਦਗਾਰ ਅਤੇ ਸਭ ਦੇ ਚਹੇਤੇ ਵਿਅਕਤੀ ਵਜੋਂ ਯਾਦ ਕੀਤਾ ਹੈ। ਐਡਵਰਡ ਅਤੇ ਸੇਰੀਨਾ ਦੀ ਪ੍ਰੇਮ ਕਹਾਣੀ ਵੀ ਬਹੁਤ ਖਾਸ ਸੀ। ਦੋਵੇਂ ਮੁੰਬਈ ਵਿੱਚ ਬਚਪਨ ਤੋਂ ਇੱਕ-ਦੂਜੇ ਨੂੰ ਜਾਣਦੇ ਸਨ। ਪਰਿਵਾਰਕ ਜਾਣ-ਪਛਾਣ ਕਾਰਨ ਰਿਸ਼ਤੇਦਾਰ ਅਕਸਰ ਮਜ਼ਾਕ ਵਿੱਚ ਕਹਿੰਦੇ ਸਨ ਕਿ ਦੋਵੇਂ ਵੱਡੇ ਹੋ ਕੇ ਵਿਆਹ ਕਰਨਗੇ।
ਸੇਰੀਨਾ ਨੇ ਦੱਸਿਆ ਕਿ ਬਚਪਨ ਵਿੱਚ ਐਡਵਰਡ ਨੂੰ ਇਹ ਗੱਲਾਂ ਪਸੰਦ ਨਹੀਂ ਸਨ, ਪਰ 2016 ਵਿੱਚ ਦੋਵੇਂ ਮੁੜ ਮਿਲੇ ਅਤੇ ਦੋਸਤੀ ਪਿਆਰ ਵਿੱਚ ਬਦਲ ਗਈ। 2018 ਵਿੱਚ ਉਨ੍ਹਾਂ ਨੇ ਵਿਆਹ ਕਰ ਲਿਆ। ਸੇਰੀਨਾ 2023 ਵਿੱਚ ਨਿਊਜ਼ੀਲੈਂਡ ਆਈ ਸੀ। ਐਡਵਰਡ ਇਸ ਤੋਂ ਪਹਿਲਾਂ ਇੱਕ ਅੰਤਰਰਾਸ਼ਟਰੀ ਵਿਦਿਆਰਥੀ ਵਜੋਂ ਨਿਊਜ਼ੀਲੈਂਡ ਪਹੁੰਚਿਆ ਸੀ ਅਤੇ ਬਾਅਦ ਵਿੱਚ ਆਕਲੈਂਡ ਵਿੱਚ ਨੌਕਰੀ ਕਰ ਰਿਹਾ ਸੀ। ਪਰਿਵਾਰ ਦਾ ਕਹਿਣਾ ਹੈ ਕਿ ਐਡਵਰਡ ਦੀਆਂ ਯਾਦਾਂ ਅਤੇ ਉਸਦਾ ਪਿਆਰ ਹਮੇਸ਼ਾ ਉਨ੍ਹਾਂ ਦੇ ਦਿਲਾਂ ਵਿੱਚ ਜ਼ਿੰਦਾ ਰਹੇਗਾ।
