Auckland (NZ Punjabi News) – ਆਕਲੈਂਡ ਦੇ ਇੱਕ ਸਕੂਲ ਦੀ ਪ੍ਰਿੰਸੀਪਲ ਨੇ ਦਾਅਵਾ ਕੀਤਾ ਹੈ ਕਿ ਉਸ ਨੇ ਵਿਸ਼ੇਸ਼ ਲੋੜਾਂ ਵਾਲੇ ਬੱਚਿਆਂ ਦੀ ਆਵਾਜਾਈ ਲਈ ਨਿਯੁਕਤ ਕੀਤੀ ਗਈ ਕੰਪਨੀ ਬਾਰੇ ਗੰਭੀਰ ਚਿੰਤਾਵਾਂ ਇੱਕ ਮਹੀਨਾ ਪਹਿਲਾਂ ਹੀ ਜਤਾਈਆਂ ਸਨ। ਇਹ ਖੁਲਾਸਾ ਉਸ ਵੇਲੇ ਸਾਹਮਣੇ ਆਇਆ ਹੈ ਜਦੋਂ 8 ਸਾਲਾ ਗੁਰਸ਼ਬਾਦ ਸਿੰਘ ਦੀ ਇੱਕ ਟਰਾਂਸਪੋਰਟ ਵੈਨ ਵਿਚੋਂ ਨਿਕਲਣ ਤੋਂ ਬਾਅਦ ਮੌਤ ਹੋ ਗਈ।
ਵੈਰਾਉ ਵੈਲੀ ਸਪੈਸ਼ਲ ਸਕੂਲ ਦੀ ਪ੍ਰਿੰਸੀਪਲ ਨੈਟਲੀ ਟੌਡ ਨੇ ਕਿਹਾ ਕਿ ਅਪ੍ਰੈਲ ਵਿੱਚ ਸਿੱਖਿਆ ਮੰਤਰਾਲੇ ਦਾ ਠੇਕਾ ਸੰਭਾਲਣ ਵਾਲੀ ਰਿਚੀਜ਼ ਟਰਾਂਸਪੋਰਟ ਦੀਆਂ ਸੇਵਾਵਾਂ ਨੂੰ ਦੇਖ ਕੇ ਉਹ ਚਿੰਤਤ ਹੋ ਗਈ ਸੀ। ਉਸ ਨੇ ਦੱਸਿਆ ਕਿ ਉਸ ਨੇ ਇੱਕ ਵ੍ਹੀਲਚੇਅਰ ਵਰਤਣ ਵਾਲੇ ਵਿਦਿਆਰਥੀ ਨੂੰ ਅਜਿਹੀ ਵੈਨ ਵਿੱਚ ਚੜ੍ਹਾਇਆ ਜਾਂਦਾ ਦੇਖਿਆ ਜੋ ਉਸ ਦੇ ਅਨੁਸਾਰ ਇਸ ਮਕਸਦ ਲਈ ਢੁੱਕਵੀਂ ਨਹੀਂ ਸੀ।
ਟੌਡ ਨੇ ਕਿਹਾ ਕਿ ਉਸ ਨੇ ਕੰਪਨੀ ਨੂੰ ਸਾਫ਼ ਸ਼ਬਦਾਂ ਵਿੱਚ ਕਿਹਾ ਸੀ ਕਿ “ਅਸੀਂ ਕੋਈ ਪਾਰਸਲ ਨਹੀਂ, ਸਗੋਂ ਨਾਜ਼ੁਕ ਬੱਚਿਆਂ ਦੀ ਆਵਾਜਾਈ ਕਰ ਰਹੇ ਹਾਂ।” ਉਸ ਨੇ ਸਿੱਖਿਆ ਮੰਤਰਾਲੇ ਨੂੰ ਭੇਜੀਆਂ ਈਮੇਲਾਂ ਵਿੱਚ ਵੀ ਚੇਤਾਵਨੀ ਦਿੱਤੀ ਸੀ ਕਿ ਇਹ ਪ੍ਰਬੰਧ ਵ੍ਹੀਲਚੇਅਰ ਵਰਤਣ ਵਾਲੇ ਬੱਚਿਆਂ ਲਈ ਖਤਰਾ ਵਧਾ ਸਕਦਾ ਹੈ, ਖਾਸ ਕਰਕੇ ਕਿਸੇ ਹਾਦਸੇ ਦੀ ਸਥਿਤੀ ਵਿੱਚ। ਮੰਤਰਾਲੇ ਨੇ ਉਸ ਸਮੇਂ ਕਿਹਾ ਸੀ ਕਿ ਉਹ ਕੰਪਨੀ ਦੇ ਜਵਾਬ ਤੋਂ ਸੰਤੁਸ਼ਟ ਹੈ, ਪਰ ਵਾਧੂ ਭਰੋਸੇ ਲਈ ਵਾਹਨਾਂ ਅਤੇ ਸੇਵਾਵਾਂ ਦਾ ਅੰਦਰੂਨੀ ਆਡਿਟ ਵੀ ਕੀਤਾ ਜਾਵੇਗਾ।
ਪਿਛਲੇ ਹਫ਼ਤੇ ਜਦੋਂ ਟੌਡ ਨੂੰ ਪਤਾ ਲੱਗਾ ਕਿ ਆਟੀਜ਼ਮ ਸਪੈਕਟ੍ਰਮ ਨਾਲ ਸੰਬੰਧਿਤ 8 ਸਾਲਾ ਗੁਰਸ਼ਬਾਦ ਸਿੰਘ ਸਕੂਲ ਤੋਂ ਘਰ ਲੈ ਜਾ ਰਹੀ ਰਿਚੀਜ਼ ਦੀ ਵੈਨ ਵਿਚੋਂ ਨਿਕਲ ਗਿਆ ਅਤੇ ਬਾਅਦ ਵਿੱਚ ਉਸ ਦੀ ਡੁੱਬਣ ਕਾਰਨ ਮੌਤ ਹੋ ਗਈ, ਤਾਂ ਉਸ ਨੇ ਕਿਹਾ ਕਿ ਉਸ ਦੀਆਂ ਸਭ ਤੋਂ ਵੱਡੀਆਂ ਚਿੰਤਾਵਾਂ ਸੱਚ ਸਾਬਤ ਹੋ ਗਈਆਂ। ਪੁਲਿਸ ਗੁਰਸ਼ਬਾਦ ਦੀ ਮੌਤ ਦੇ ਹਾਲਾਤਾਂ ਦੀ ਜਾਂਚ ਕਰ ਰਹੀ ਹੈ। ਇਸ ਦੇ ਨਾਲ ਹੀ ਕੋਰੋਨਰ, ਵਰਕਸੇਫ ਅਤੇ ਸਿੱਖਿਆ ਮੰਤਰਾਲਾ ਵੀ ਮਾਮਲੇ ਦੀ ਜਾਂਚ ਕਰ ਰਹੇ ਹਨ।
ਰਿਚੀਜ਼ ਟਰਾਂਸਪੋਰਟ ਨੇ ਇਕ ਬਿਆਨ ਵਿੱਚ ਕਿਹਾ ਕਿ ਉਹ ਚੱਲ ਰਹੀਆਂ ਜਾਂਚਾਂ ਵਿੱਚ ਪੂਰਾ ਸਹਿਯੋਗ ਕਰ ਰਹੀ ਹੈ ਅਤੇ ਇਸ ਕਾਰਨ ਇਸ ਵੇਲੇ ਹੋਰ ਕੋਈ ਟਿੱਪਣੀ ਕਰਨਾ ਉਚਿਤ ਨਹੀਂ ਹੈ। ਉੱਧਰ, ਵੈਰਾਉ ਵੈਲੀ ਸਪੈਸ਼ਲ ਸਕੂਲ ਦੇ ਇੱਕ ਵਿਦਿਆਰਥੀ ਦੀ ਮਾਂ ਨੇ ਵੀ ਦੱਸਿਆ ਕਿ ਉਸ ਨੇ ਪਿਛਲੇ ਮਹੀਨੇ ਮੰਤਰਾਲੇ ਅਤੇ ਕੰਪਨੀ ਕੋਲ ਸ਼ਿਕਾਇਤ ਦਰਜ ਕਰਵਾਈ ਸੀ। ਉਸ ਨੇ ਦੋਸ਼ ਲਾਇਆ ਕਿ ਵ੍ਹੀਲਚੇਅਰ ਵਰਤਣ ਵਾਲੇ ਬੱਚਿਆਂ ਨੂੰ ਹੋਰ ਵਿਦਿਆਰਥੀਆਂ ਨਾਲ ਇਕੱਠੇ ਲਿਜਾਣਾ ਸੁਰੱਖਿਆ ਲਈ ਖਤਰਾ ਬਣ ਸਕਦਾ ਹੈ ਅਤੇ ਡਰਾਈਵਰਾਂ ਨੂੰ ਬੱਚਿਆਂ ਦੀਆਂ ਵਿਸ਼ੇਸ਼ ਲੋੜਾਂ ਬਾਰੇ ਲੋੜੀਂਦੀ ਜਾਣਕਾਰੀ ਜਾਂ ਸਿਖਲਾਈ ਨਹੀਂ ਦਿੱਤੀ ਜਾਂਦੀ।
ਉਸ ਨੇ ਕਿਹਾ ਕਿ ਇਨ੍ਹਾਂ ਚਿੰਤਾਵਾਂ ਕਾਰਨ ਉਸ ਨੇ ਆਪਣੇ ਬੱਚੇ ਨੂੰ ਇਸ ਸੇਵਾ ਤੋਂ ਹਟਾ ਕੇ ਨਿੱਜੀ ਟੈਕਸੀ ਦੀ ਸਹੂਲਤ ਲੈਣੀ ਸ਼ੁਰੂ ਕਰ ਦਿੱਤੀ ਹੈ।
