ਕਵੀਨਸਟਾਊਨ (NZ Punjabi News) – ਦੁਨੀਆ ਦੀ ਮਸ਼ਹੂਰ ਇਲੈਕਟ੍ਰਿਕ ਵਾਹਨ ਨਿਰਮਾਤਾ ਕੰਪਨੀ Tesla ਦੀ ਡਰਾਈਵਰ-ਰਹਿਤ Cybercab ਨੂੰ ਪਹਿਲੀ ਵਾਰ ਨਿਊਜ਼ੀਲੈਂਡ ਦੀਆਂ ਜਨਤਕ ਸੜਕਾਂ ‘ਤੇ ਟੈਸਟਿੰਗ ਦੌਰਾਨ ਦੇਖਿਆ ਗਿਆ ਹੈ। ਇਹ ਵਾਹਨ ਦੱਖਣੀ ਟਾਪੂ ਦੇ ਕਾਰਡਰੋਨਾ ਵੈਲੀ ਰੋਡ ਅਤੇ Southern Hemisphere Proving Grounds ਵਿੱਚ ਠੰਢੇ ਮੌਸਮ ਦੀ ਜਾਂਚ ਲਈ ਚਲਾਇਆ ਜਾ ਰਿਹਾ ਹੈ।
ਸੋਸ਼ਲ ਮੀਡੀਆ ‘ਤੇ ਸਾਹਮਣੇ ਆਈਆਂ ਤਸਵੀਰਾਂ ਵਿੱਚ ਸੋਨੇ ਰੰਗ ਦੀ Cybercab ਬਰਫ਼ੀਲੇ ਇਲਾਕੇ ਵਿੱਚ ਟੈਸਟਿੰਗ ਕਰਦੀ ਨਜ਼ਰ ਆ ਰਹੀ ਹੈ। ਪਿਛਲੇ ਮਹੀਨੇ Tesla ਦੀਆਂ ਦੋ Cybercab ਗੱਡੀਆਂ ਨਿਊਜ਼ੀਲੈਂਡ ਪਹੁੰਚੀਆਂ ਸਨ, ਜਿਨ੍ਹਾਂ ਦੀ ਹੁਣ ਸਰਦੀਆਂ ਵਾਲੇ ਹਾਲਾਤਾਂ ਵਿੱਚ ਜਾਂਚ ਕੀਤੀ ਜਾ ਰਹੀ ਹੈ।
Tesla ਨੇ ਪੁਸ਼ਟੀ ਕੀਤੀ ਹੈ ਕਿ ਇਹ ਉਸ ਦੇ ਆਪਣੇ ਪ੍ਰੋਟੋਟਾਈਪ ਵਾਹਨ ਹਨ ਅਤੇ ਇਨ੍ਹਾਂ ਦੀ ਬਰਫ਼ ਅਤੇ ਬਹੁਤ ਘੱਟ ਤਾਪਮਾਨ ਵਿੱਚ ਕਾਰਗੁਜ਼ਾਰੀ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਕਵੀਨਸਟਾਊਨ ਨੇੜੇ ਸਥਿਤ ਇਹ ਟੈਸਟਿੰਗ ਸੈਂਟਰ ਦੁਨੀਆ ਭਰ ਦੀਆਂ ਵਾਹਨ ਨਿਰਮਾਤਾ ਕੰਪਨੀਆਂ ਵੱਲੋਂ ਸਰਦੀਆਂ ਦੌਰਾਨ ਵਰਤਿਆ ਜਾਂਦਾ ਹੈ।
ਹਾਲਾਂਕਿ Cybercab ਵਿੱਚ ਯਾਤਰੀ ਮੌਜੂਦ ਸਨ, ਪਰ ਅਜੇ ਇਹ ਸਪੱਸ਼ਟ ਨਹੀਂ ਹੋਇਆ ਕਿ ਵਾਹਨ ਪੂਰੀ ਤਰ੍ਹਾਂ ਆਟੋਨੋਮਸ (Self-Driving) ਮੋਡ ਵਿੱਚ ਚੱਲ ਰਿਹਾ ਸੀ ਜਾਂ ਕਿਸੇ ਵਿਅਕਤੀ ਵੱਲੋਂ ਕੰਟਰੋਲ ਕੀਤਾ ਜਾ ਰਿਹਾ ਸੀ। ਇਹ ਨਿਊਜ਼ੀਲੈਂਡ ਵਿੱਚ Cybercab ਦੀ ਜਨਤਕ ਸੜਕ ‘ਤੇ ਪਹਿਲੀ ਦਰਜ ਕੀਤੀ ਗਈ ਟੈਸਟਿੰਗ ਮੰਨੀ ਜਾ ਰਹੀ ਹੈ।
