ਆਕਲੈਂਡ (NZ Punjabi News) – ਆਸਟ੍ਰੇਲੀਆ ਦੀ ਸੰਸਦ ਭਵਨ ਵਿੱਚ ਆਸਟ੍ਰੇਲੀਆ ਦੇ ਰਾਸ਼ਟਰੀ ਝੰਡੇ ਦੇ 125 ਸਾਲ ਪੂਰੇ ਹੋਣ ਮੌਕੇ ਕਰਵਾਏ ਗਏ ਸਮਾਗਮ ਦੌਰਾਨ ਇੱਕ ਅਜੀਬੋ-ਗਰੀਬ ਗਲਤੀ ਸਾਹਮਣੇ ਆਈ। ਝੰਡਿਆਂ ਦੀ ਪ੍ਰਦਰਸ਼ਨੀ ਵਿੱਚ ਗਲਤੀ ਨਾਲ ਨਿਊਜ਼ੀਲੈਂਡ ਦੇ ਦੋ ਝੰਡੇ ਵੀ ਲਗਾ ਦਿੱਤੇ ਗਏ।
ਇਹ ਗਲਤੀ ਕੈਨਬਰਾ ਦੇ ਕੈਪੀਟਲ ਹਿੱਲ ਸਥਿਤ ਸੰਸਦ ਭਵਨ ਵਿੱਚ ਵੀਰਵਾਰ ਨੂੰ ਹੋਈ। ਆਸਟ੍ਰੇਲੀਆਈ ਰਾਸ਼ਟਰੀ ਝੰਡਾ ਪਹਿਲੀ ਵਾਰ 3 ਸਤੰਬਰ 1901 ਨੂੰ ਲਹਿਰਾਇਆ ਗਿਆ ਸੀ ਅਤੇ ਇਸ ਦੀ 125ਵੀਂ ਵਰ੍ਹੇਗੰਢ ਮੌਕੇ 44 ਝੰਡਿਆਂ ਦੀ ਪ੍ਰਦਰਸ਼ਨੀ ਲਗਾਈ ਗਈ ਸੀ।
ਇਨ੍ਹਾਂ 44 ਝੰਡਿਆਂ ਵਿੱਚ ਨਿਊਜ਼ੀਲੈਂਡ ਦੇ ਦੋ ਝੰਡੇ ਵੀ ਸ਼ਾਮਲ ਹੋ ਗਏ।
ਦੋਵਾਂ ਦੇਸ਼ਾਂ ਦੇ ਝੰਡਿਆਂ ਦਾ ਨੀਲਾ ਪਿਛੋਕੜ, ਯੂਨੀਅਨ ਜੈਕ ਅਤੇ ਸਾਊਦਰਨ ਕਰਾਸ ਕਾਰਨ ਦਿੱਖ ਕਾਫ਼ੀ ਮਿਲਦੀ-ਜੁਲਦੀ ਹੈ। ਹਾਲਾਂਕਿ, ਦੋਵਾਂ ਵਿੱਚ ਤਾਰਿਆਂ ਦਾ ਡਿਜ਼ਾਈਨ ਵੱਖਰਾ ਹੈ। ਨਿਊਜ਼ੀਲੈਂਡ ਦੇ ਝੰਡੇ ’ਤੇ ਚਾਰ ਲਾਲ ਤਾਰੇ ਹਨ, ਜਿਨ੍ਹਾਂ ਦੇ ਆਲੇ-ਦੁਆਲੇ ਚਿੱਟੀ ਲਾਈਨ ਹੈ। ਦੂਜੇ ਪਾਸੇ ਆਸਟ੍ਰੇਲੀਆ ਦੇ ਝੰਡੇ ’ਤੇ ਛੇ ਚਿੱਟੇ ਤਾਰੇ ਹਨ, ਜਿਨ੍ਹਾਂ ਵਿੱਚ ਯੂਨੀਅਨ ਜੈਕ ਦੇ ਹੇਠਾਂ ਵੱਡਾ ਕਾਮਨਵੈਲਥ ਸਟਾਰ ਵੀ ਸ਼ਾਮਲ ਹੈ।
ਆਸਟ੍ਰੇਲੀਆ ਦਾ ਮੌਜੂਦਾ ਝੰਡਾ 1901 ਵਿੱਚ ਕਰਵਾਏ ਗਏ ਇੱਕ ਰਾਸ਼ਟਰੀ ਮੁਕਾਬਲੇ ਤੋਂ ਬਾਅਦ ਤਿਆਰ ਹੋਇਆ ਸੀ। ਇਸ ਮੁਕਾਬਲੇ ਵਿੱਚ 30,000 ਤੋਂ ਵੱਧ ਡਿਜ਼ਾਈਨ ਪੇਸ਼ ਕੀਤੇ ਗਏ ਸਨ। ਆਖ਼ਰਕਾਰ ਲਗਭਗ ਇੱਕੋ ਜਿਹੇ ਪੰਜ ਡਿਜ਼ਾਈਨਾਂ ਨੂੰ ਜੇਤੂ ਚੁਣਿਆ ਗਿਆ ਅਤੇ ਨਵਾਂ ਝੰਡਾ ਪਹਿਲੀ ਵਾਰ 3 ਸਤੰਬਰ 1901 ਨੂੰ ਮੈਲਬਰਨ ਵਿੱਚ ਲਹਿਰਾਇਆ ਗਿਆ।
ਨਿਊਜ਼ੀਲੈਂਡ ਨੇ 1902 ਵਿੱਚ New Zealand Ensign Act ਰਾਹੀਂ ਆਪਣੇ ਮੌਜੂਦਾ ਝੰਡੇ ਨੂੰ ਰਸਮੀ ਤੌਰ ’ਤੇ ਅਪਣਾਇਆ ਸੀ। ਹਾਲਾਂਕਿ, ਇਸ ਤੋਂ ਪਹਿਲਾਂ ਵੀ ਬਲੂ ਐਨਸਾਈਨ ਦੇ ਵੱਖ-ਵੱਖ ਰੂਪ ਵਰਤੇ ਜਾਂਦੇ ਰਹੇ ਸਨ।
ਦੋਵਾਂ ਝੰਡਿਆਂ ਦੀ ਸਮਾਨਤਾ ਲੰਬੇ ਸਮੇਂ ਤੋਂ ਦੋਵੇਂ ਦੇਸ਼ਾਂ ਵਿੱਚ ਮਜ਼ਾਕ ਅਤੇ ਕਦੇ-ਕਦੇ ਸਿਆਸੀ ਬਹਿਸ ਦਾ ਵਿਸ਼ਾ ਰਹੀ ਹੈ।
2018 ਵਿੱਚ ਨਿਊਜ਼ੀਲੈਂਡ ਦੇ ਉਸ ਸਮੇਂ ਦੇ ਉਪ ਪ੍ਰਧਾਨ ਮੰਤਰੀ ਵਿਨਸਟਨ ਪੀਟਰਜ਼ ਨੇ ਵੀ ਕਿਹਾ ਸੀ ਕਿ ਝੰਡਾ ਬਦਲਣ ਬਾਰੇ ਆਸਟ੍ਰੇਲੀਆ ਨੂੰ ਸੋਚਣਾ ਚਾਹੀਦਾ ਹੈ। ਉਨ੍ਹਾਂ ਦਾ ਦਾਅਵਾ ਸੀ ਕਿ ਨਿਊਜ਼ੀਲੈਂਡ ਨੇ ਇਹ ਡਿਜ਼ਾਈਨ ਪਹਿਲਾਂ ਵਰਤਿਆ ਸੀ ਅਤੇ ਆਸਟ੍ਰੇਲੀਆ ਨੇ ਇਸ ਦੀ ਨਕਲ ਕੀਤੀ।
ਹੁਣ ਸੰਸਦ ਭਵਨ ਵਿੱਚ ਹੋਈ ਤਾਜ਼ਾ ਗਲਤੀ ਨੇ ਇਸ ਪੁਰਾਣੀ ਬਹਿਸ ਨੂੰ ਇੱਕ ਵਾਰ ਫਿਰ ਚਰਚਾ ਵਿੱਚ ਲਿਆ ਦਿੱਤਾ ਹੈ।
ਆਸਟ੍ਰੇਲੀਆ ਦੇ Department of the Prime Minister and Cabinet ਨੇ ਕਿਹਾ ਕਿ ਇਹ ਸਮਾਗਮ ਆਸਟ੍ਰੇਲੀਆਈ ਰਾਸ਼ਟਰੀ ਝੰਡੇ ਦੇ 125 ਸਾਲ ਪੂਰੇ ਹੋਣ ਦੀ ਯਾਦ ਵਿੱਚ ਕਰਵਾਇਆ ਗਿਆ ਸੀ। ਇਹ ਝੰਡਾ ਅੱਜ ਵੀ ਸੰਸਦ ਭਵਨ ਦੇ ਉੱਪਰ ਅਤੇ ਆਸਟ੍ਰੇਲੀਆਈ Aboriginal ਅਤੇ Torres Strait Islander ਝੰਡਿਆਂ ਦੇ ਨਾਲ ਲਹਿਰਾਇਆ ਜਾਂਦਾ ਹੈ।
ਸਰਕਾਰੀ ਵਰ੍ਹੇਗੰਢ ਸੰਦੇਸ਼ ਵਿੱਚ ਨਿਊਜ਼ੀਲੈਂਡ ਦੇ ਝੰਡੇ ਦਾ ਕੋਈ ਜ਼ਿਕਰ ਨਹੀਂ ਕੀਤਾ ਗਿਆ। ਪਰ ਵੀਰਵਾਰ ਨੂੰ ਕੁਝ ਸਮੇਂ ਲਈ ਕੀਤੀ ਗਈ ਪ੍ਰਦਰਸ਼ਨੀ ਵਿੱਚ ਨਿਊਜ਼ੀਲੈਂਡ ਦਾ ਝੰਡਾ ਆਸਟ੍ਰੇਲੀਆ ਦੀ ਰਾਜਨੀਤੀ ਦੇ ਕੇਂਦਰ ਸੰਸਦ ਭਵਨ ਵਿੱਚ ਅਣਜਾਣੇ ਵਿੱਚ ਆਪਣੀ ਜਗ੍ਹਾ ਬਣਾ ਗਿਆ।
