ਆਕਲੈਂਡ (NZ Punjabi News) : ਨਿਊਜ਼ੀਲੈਂਡ ਵਿੱਚ ਸ਼ੁੱਕਰਵਾਰ ਦੀ ਤੂਫ਼ਾਨੀ ਰਾਤ ਤੋਂ ਬਾਅਦ ਅੱਜ ਸ਼ਨੀਵਾਰ ਨੂੰ ਵੀ ਕਈ ਇਲਾਕਿਆਂ ਵਿੱਚ ਭਿਆਨਕ ਗਰਜ਼-ਚਮਕ ਨਾਲ ਮੀਂਹ ਪੈਣ ਦੀ ਚਿਤਾਵਨੀ ਜਾਰੀ ਕੀਤੀ ਗਈ ਹੈ। ਮੌਸਮ ਵਿਭਾਗ MetService ਮੁਤਾਬਕ ਰਾਤ ਭਰ ਉੱਤਰੀ ਟਾਪੂ ਵਿੱਚ ਲਗਭਗ 1,845 ਬਿਜਲੀਆਂ ਡਿੱਗਣ ਦੇ ਮਾਮਲੇ ਦਰਜ ਕੀਤੇ ਗਏ, ਜਦਕਿ ਤੜਕੇ ਦੇ ਸਮੇਂ ਬਿਜਲੀ ਡਿੱਗਣ ਦੀਆਂ ਘਟਨਾਵਾਂ ਵਿੱਚ ਤੇਜ਼ੀ ਆਈ।
ਸ਼ੁੱਕਰਵਾਰ ਨੂੰ ਆਕਲੈਂਡ ਵਿੱਚ ਭਾਰੀ ਮੀਂਹ ਕਾਰਨ ਕਈ ਥਾਵਾਂ ‘ਤੇ ਪਾਣੀ ਭਰ ਗਿਆ ਸੀ। ਇਸ ਤੋਂ ਇਲਾਵਾ ਬਿਜਲੀ ਅਤੇ ਇੰਟਰਨੈੱਟ ਸੇਵਾਵਾਂ ਵੀ ਪ੍ਰਭਾਵਿਤ ਹੋਈਆਂ ਅਤੇ ਮੌਸਮ ਨਾਲ ਸਬੰਧਤ ਕਈ ਐਮਰਜੈਂਸੀ ਕਾਲਾਂ ਮਿਲੀਆਂ।
MetService ਵੱਲੋਂ ਆਕਲੈਂਡ, ਕੋਰੋਮੰਡਲ ਪੈਨਿਨਸੁਲਾ, ਵਾਇਕਾਟੋ, ਵੇਟੋਮੋ, ਤੌਮਾਰੁਨੁਈ, ਬੇਅ ਆਫ ਪਲੈਂਟੀ, ਰੋਟੋਰੂਆ, ਟਾਊਪੋ, ਤਾਰਾਨਾਕੀ ਅਤੇ ਤਾਈਹਾਪੇ ਵਿੱਚ ਸ਼ਾਮ 6 ਵਜੇ ਤੱਕ ਗੰਭੀਰ ਤੂਫ਼ਾਨਾਂ ਦੀ ਵਾਚ ਜਾਰੀ ਰੱਖੀ ਗਈ ਹੈ।
ਮੌਸਮ ਵਿਭਾਗ ਨੇ ਚਿਤਾਵਨੀ ਦਿੱਤੀ ਹੈ ਕਿ ਕੁਝ ਇਲਾਕਿਆਂ ਵਿੱਚ ਇੱਕ ਘੰਟੇ ਦੌਰਾਨ 25 ਤੋਂ 40 ਮਿਲੀਮੀਟਰ ਤੱਕ ਮੀਂਹ ਪੈ ਸਕਦਾ ਹੈ। ਇੰਨੀ ਤੇਜ਼ ਬਾਰਿਸ਼ ਕਾਰਨ ਅਚਾਨਕ ਹੜ੍ਹ ਆਉਣ, ਨੀਵੇਂ ਇਲਾਕਿਆਂ ਵਿੱਚ ਪਾਣੀ ਭਰਨ ਅਤੇ ਜ਼ਮੀਨ ਖਿਸਕਣ ਦਾ ਖ਼ਤਰਾ ਬਣ ਸਕਦਾ ਹੈ।
ਦੁਪਹਿਰ ਤੋਂ ਹੇਠਲੇ ਉੱਤਰੀ ਟਾਪੂ ਦੇ ਕਈ ਇਲਾਕਿਆਂ ਵਿੱਚ ਵੀ ਤੂਫ਼ਾਨੀ ਮੌਸਮ ਦੀ ਸੰਭਾਵਨਾ ਹੈ। ਇਨ੍ਹਾਂ ਵਿੱਚ ਵਾਂਗਾਨੁਈ, ਮਨਾਵਾਤੂ, ਤਾਰਾਰੂਆ, ਕਾਪਿਤੀ-ਹੋਰੋਵੇਨੂਆ, ਵੈਰਾਰਾਪਾ ਅਤੇ ਵੈਲਿੰਗਟਨ ਸ਼ਾਮਲ ਹਨ।
ਦੱਖਣੀ ਟਾਪੂ ਦੇ ਮਾਰਲਬਰੋ, ਨੇਲਸਨ, ਬੁਲਰ ਅਤੇ ਕੈਂਟਰਬਰੀ ਦੇ ਉੱਚੇ ਇਲਾਕਿਆਂ ਵਿੱਚ ਵੀ ਦੁਪਹਿਰ 1 ਵਜੇ ਤੋਂ ਸ਼ਾਮ 6 ਵਜੇ ਤੱਕ ਤੂਫ਼ਾਨੀ ਗਤੀਵਿਧੀਆਂ ਦੀ ਚਿਤਾਵਨੀ ਦਿੱਤੀ ਗਈ ਹੈ।
MetService ਦੇ ਮੌਸਮ ਵਿਗਿਆਨੀ ਸੈਮਕੇਲੋ ਮਗਵਾਲਾ ਅਨੁਸਾਰ ਰਾਤ ਦੌਰਾਨ ਕੁਝ ਇਲਾਕਿਆਂ ਵਿੱਚ ਇੱਕ ਘੰਟੇ ਵਿੱਚ 20 ਤੋਂ 33 ਮਿਲੀਮੀਟਰ ਤੱਕ ਮੀਂਹ ਦਰਜ ਕੀਤਾ ਗਿਆ, ਜਦਕਿ ਹੋਰ ਕਈ ਥਾਵਾਂ ‘ਤੇ 10 ਤੋਂ 15 ਮਿਲੀਮੀਟਰ ਪ੍ਰਤੀ ਘੰਟਾ ਬਾਰਿਸ਼ ਹੋਈ।
ਇਹ ਮੌਸਮੀ ਚਿਤਾਵਨੀਆਂ ਅਜਿਹੇ ਸਮੇਂ ਆਈਆਂ ਹਨ ਜਦੋਂ ਨਿਊਜ਼ੀਲੈਂਡ ਵਿੱਚ ਅੱਜ ਆਮ ਚੋਣਾਂ ਲਈ ਵੋਟਿੰਗ ਹੋ ਰਹੀ ਹੈ। ਮੌਸਮ ਵਿਭਾਗ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਵੋਟ ਪਾਉਣ ਲਈ ਘਰੋਂ ਨਿਕਲਣ ਸਮੇਂ ਮੌਸਮ ਦੀ ਤਾਜ਼ਾ ਜਾਣਕਾਰੀ ਜ਼ਰੂਰ ਚੈੱਕ ਕਰਨ ਅਤੇ ਸੜਕਾਂ ‘ਤੇ ਪਾਣੀ ਭਰਨ ਕਾਰਨ ਵਾਹਨ ਚਲਾਉਂਦੇ ਸਮੇਂ ਖ਼ਾਸ ਸਾਵਧਾਨੀ ਵਰਤਣ।
ਅਧਿਕਾਰੀਆਂ ਨੇ ਲੋਕਾਂ ਨੂੰ ਸਲਾਹ ਦਿੱਤੀ ਹੈ ਕਿ ਗਰਜ਼-ਚਮਕ ਅਤੇ ਭਾਰੀ ਮੀਂਹ ਦੌਰਾਨ ਸੁਰੱਖਿਅਤ ਥਾਵਾਂ ‘ਤੇ ਰਹਿਣ ਅਤੇ MetService ਵੱਲੋਂ ਜਾਰੀ ਤਾਜ਼ਾ ਮੌਸਮੀ ਚਿਤਾਵਨੀਆਂ ‘ਤੇ ਨਜ਼ਰ ਰੱਖਣ।
ਸਰੋਤ: MetService ਅਤੇ 1News
