ਵੈਲਿੰਗਟਨ (NZ Punjabi News) – ਵੈਲਿੰਗਟਨ ਦੇ Keith Miller ਨੇ AI ਆਧਾਰਿਤ ਪਾਰਕਿੰਗ ਕੈਮਰਿਆਂ ਕਾਰਨ ਦੋ ਵਾਰ ਗਲਤ ਜੁਰਮਾਨਾ ਲੱਗਣ ਤੋਂ ਬਾਅਦ Smart Compliance Management ਖ਼ਿਲਾਫ਼ Commerce Commission ਕੋਲ ਸ਼ਿਕਾਇਤ ਦਰਜ ਕਰਵਾਈ ਹੈ। Miller ਦਾ ਕਹਿਣਾ ਹੈ ਕਿ ਉਹ ਇਹ ਮਾਮਲਾ ਇਸ ਲਈ ਅੱਗੇ ਲੈ ਕੇ ਗਿਆ ਤਾਂ ਜੋ ਹੋਰ “ਬੇਕਸੂਰ” ਲੋਕਾਂ ਨੂੰ ਇਸ ਤਰ੍ਹਾਂ ਦੀ ਪਰੇਸ਼ਾਨੀ ਦਾ ਸਾਹਮਣਾ ਨਾ ਕਰਨਾ ਪਵੇ।
ਇਹ ਮਾਮਲਾ ANPR (Automatic Number Plate Recognition) ਤਕਨਾਲੋਜੀ ਨਾਲ ਜੁੜਿਆ ਹੈ, ਜਿਸ ਰਾਹੀਂ ਕੈਮਰੇ ਵਾਹਨਾਂ ਦੇ ਨੰਬਰ ਪਲੇਟ ਸਕੈਨ ਕਰਕੇ ਪਾਰਕਿੰਗ ਸਮਾਂ ਗਿਣਦੇ ਹਨ। Commerce Commission ਇਸ ਵੇਲੇ ਪਾਰਕਿੰਗ ਕੰਪਨੀਆਂ ਖ਼ਿਲਾਫ਼ ਮਿਲ ਰਹੀਆਂ ਸ਼ਿਕਾਇਤਾਂ ਦੀ ਜਾਂਚ ਕਰ ਰਹੀ ਹੈ ਕਿ ਕਿਤੇ ਉਹ Fair Trading Act ਦੀ ਉਲੰਘਣਾ ਤਾਂ ਨਹੀਂ ਕਰ ਰਹੀਆਂ। ਪਿਛਲੇ ਛੇ ਮਹੀਨਿਆਂ ਵਿੱਚ ਮਿਲੀਆਂ 250 ਪਾਰਕਿੰਗ ਸ਼ਿਕਾਇਤਾਂ ਵਿੱਚੋਂ 17 ਮਾਮਲੇ ANPR ਤਕਨਾਲੋਜੀ ਨਾਲ ਸੰਬੰਧਿਤ ਸਨ।
Keith Miller ਨੂੰ ਪਹਿਲਾ ਜੁਰਮਾਨਾ ਦਸੰਬਰ ਵਿੱਚ Wellington ਦੇ Miramar ਸਥਿਤ New World ਸੁਪਰਮਾਰਕੀਟ ਦੇ ਕਾਰ ਪਾਰਕ ਵਿੱਚ ਵਧੇਰੇ ਸਮੇਂ ਲਈ ਗੱਡੀ ਖੜੀ ਕਰਨ ਦੇ ਦੋਸ਼ ’ਚ ਮਿਲਿਆ। ਦੂਜਾ ਜੁਰਮਾਨਾ ਜਨਵਰੀ ਵਿੱਚ ਉਸੇ ਸਥਾਨ ’ਤੇ ਆਇਆ। Smart Compliance ਵੱਲੋਂ ਭੇਜੇ ਗਏ ਨੋਟਿਸਾਂ ਵਿੱਚ ਕੇਵਲ ਇੱਕ ਫੋਟੋ ਗੱਡੀ ਦੇ ਦਾਖ਼ਲ ਹੋਣ ਦੀ ਅਤੇ ਇੱਕ ਬਾਹਰ ਜਾਣ ਦੀ ਸੀ। Miller ਨੂੰ ਸ਼ੱਕ ਹੋਇਆ ਕਿ ਕੈਮਰਿਆਂ ਨੇ ਉਸਦੀ ਗੱਡੀ ਦੀਆਂ ਦੋ ਵੱਖ-ਵੱਖ ਯਾਤਰਾਵਾਂ ਨੂੰ ਇੱਕ ਹੀ ਲੰਬੀ ਪਾਰਕਿੰਗ ਵਜੋਂ ਗਿਣ ਲਿਆ।
ਜਦੋਂ ਉਸਨੇ ਰਸੀਦਾਂ ਅਤੇ ਘਰ ਦੇ ਕੈਮਰਿਆਂ ਦੀ ਫੁਟੇਜ ਚੈੱਕ ਕੀਤੀ ਤਾਂ ਪਤਾ ਲੱਗਾ ਕਿ ਇੱਕ ਵਾਰ ਉਸਦੀ ਪਤਨੀ ਸੁਪਰਮਾਰਕੀਟ ਗਈ ਸੀ ਅਤੇ ਕੁਝ ਘੰਟਿਆਂ ਬਾਅਦ ਉਹ ਖੁਦ ਗਿਆ ਸੀ।
Miller ਨੇ ਕਿਹਾ ਕਿ ਕੰਪਨੀ ਦਾ ਦਾਅਵਾ ਸੀ ਕਿ ਗੱਡੀ ਦੋ ਤੋਂ ਤਿੰਨ ਘੰਟੇ ਕਾਰ ਪਾਰਕ ਵਿੱਚ ਖੜੀ ਰਹੀ, ਜਦਕਿ ਅਸਲ ਵਿੱਚ ਦੋਵੇਂ ਵਾਰ ਸਿਰਫ਼ 15-15 ਮਿੰਟ ਲਈ ਉੱਥੇ ਗਏ ਸਨ। ਜਦੋਂ Miller ਨੇ ਇਹ ਸਬੂਤ Smart Compliance ਨੂੰ ਭੇਜੇ ਤਾਂ ਕੰਪਨੀ ਨੇ ਤੁਰੰਤ ਦੋਵੇਂ ਜੁਰਮਾਨੇ ਰੱਦ ਕਰ ਦਿੱਤੇ।
ਸੋਸ਼ਲ ਮੀਡੀਆ ’ਤੇ ਆਪਣਾ ਤਜਰਬਾ ਸਾਂਝਾ ਕਰਨ ਤੋਂ ਬਾਅਦ Miller ਨੂੰ ਪਤਾ ਲੱਗਿਆ ਕਿ ਕਈ ਹੋਰ ਲੋਕ ਵੀ ਇਸੇ ਤਰ੍ਹਾਂ ਦੇ ਗਲਤ ਜੁਰਮਾਨਿਆਂ ਦਾ ਸ਼ਿਕਾਰ ਹੋਏ ਹਨ। ਇਸ ਤੋਂ ਬਾਅਦ ਉਸਨੇ Commerce Commission ਕੋਲ ਅਧਿਕਾਰਿਕ ਸ਼ਿਕਾਇਤ ਦਰਜ ਕਰਵਾਈ।
ਉਸਦਾ ਕਹਿਣਾ ਹੈ ਕਿ ਉਸਨੂੰ ਤਕਨਾਲੋਜੀ ਨਾਲ ਕੋਈ ਸਮੱਸਿਆ ਨਹੀਂ, ਪਰ ਮੌਜੂਦਾ ਤਰੀਕੇ ਨਾਲ ਇਸਦੀ ਵਰਤੋਂ ਵਿੱਚ “ਗੰਭੀਰ ਖਾਮੀਆਂ” ਹਨ।
Smart Compliance Management ਨੇ Miller ਦੇ ਕੇਸ ਜਾਂ Commerce Commission ਦੀ ਜਾਂਚ ਬਾਰੇ ਵਿਸਥਾਰ ਨਾਲ ਜਵਾਬ ਨਹੀਂ ਦਿੱਤਾ। ਹਾਲਾਂਕਿ ਕੰਪਨੀ ਨੇ ਕਿਹਾ ਕਿ ਉਸਦੀ ANPR ਤਕਨਾਲੋਜੀ ਵਾਹਨਾਂ ਦੇ ਦਾਖ਼ਲ ਅਤੇ ਨਿਕਾਸ ਦੀਆਂ ਤਸਵੀਰਾਂ ਕੈਪਚਰ ਕਰਦੀ ਹੈ ਅਤੇ compliance officers ਉਪਲਬਧ ਸਬੂਤਾਂ ਦੇ ਆਧਾਰ ’ਤੇ breach notices ਜਾਰੀ ਕਰਦੇ ਹਨ। ਕੰਪਨੀ ਦੇ ਮੁਤਾਬਕ ਹਰ appeal ਨੂੰ ਵੱਖਰੇ ਤੌਰ ’ਤੇ review ਕੀਤਾ ਜਾਂਦਾ ਹੈ ਅਤੇ “ਨਿਆਂਸੰਗਤ ਅਤੇ ਸਮਝਦਾਰ” ਤਰੀਕੇ ਨਾਲ ਫੈਸਲਾ ਲਿਆ ਜਾਂਦਾ ਹੈ।
