ਕਿਹਾ ਨਿਊਜੀਲੈਂਡ ਵਿੱਚ ਹਰ ਇੱਕ ਨੂੰ ਆਪਣੀ ਗੱਲ ਰੱਖਣ ਦਾ ਹੱਕ
ਆਕਲੈਂਡ (ਹਰਪ੍ਰੀਤ ਸਿੰਘ) – ਬੀਤੇ ਦਿਨੀਂ ਪ੍ਰਧਾਨ ਮੰਤਰੀ ਕ੍ਰਿਸਟੋਫਰ ਲਕਸਨ ਤੇ ਭਾਰਤੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਹੋਈ ਸਾਂਝੀ ਪ੍ਰੈੱਸ ਕਾਨਫਰੰਸ ਵਿੱਚ ਨਰਿੰਦਰ ਮੋਦੀ ਵਲੋਂ ਨਿਊਜੀਲੈਂਡ ਵਿੱਚ ਭਾਰਤ ਖਿਲਾਫ ਗੈਰਕਾਨੂੰਨੀ ਤੱਤਾਂ ਖਿਲਾਫ ਕਾਰਵਾਈ ਦੀ ਹੋਈ ਮੰਗ ਨੂੰ ਕ੍ਰਿਸਟੋਫਰ ਲਕਸਨ ਨੇ ਬਹੁਤ ਹੀ ਸਹਿਜਤਾ ਨਾਲ ਨਕਾਰਿਆ। ਨਰਿੰਦਰ ਮੋਦੀ ਵਲੋਂ ਇਹ ਮੰਗ ਸਿੱਧੇ ਤੌਰ ‘ਤੇ ਨਿਊਜੀਲੈਂਡ ਵਿੱਚ ਹੋਏ ਖਾਲਿਸਤਾਨੀ ਸਮਰਥਨ ਸਬੰਧੀ ਰੇਫਰੇਂਡਮ ਵੱਲ ਇਸ਼ਾਰਾ ਸੀ ਤੇ ਇਸ ਰੈਫਰੇਂਡਮ ਬਾਰੇ ਕ੍ਰਿਸਟੋਫਰ ਲਕਸਨ ਨੂੰ ਵੀ ਪੂਰੀ ਜਾਣਕਾਰੀ ਸੀ।
ਕ੍ਰਿਸਟੋਫਰ ਲਕਸਨ ਨੇ ਮੋਦੀ ਨਾਲ ਆਪਣੀਆਂ ਮੁਲਾਕਾਤਾਂ ਤੋਂ ਬਾਅਦ ਨਿਊਜ਼ੀਲੈਂਡ ਮੀਡੀਆ ਨਾਲ ਗੱਲ ਕਰਦੇ ਹੋਏ ਕਿਹਾ ਕਿ ਉਹ ਭਾਰਤ ਦੀ ਪ੍ਰਭੂਸੱਤਾ ਦਾ ਸਤਿਕਾਰ ਕਰਦੇ ਹਨ ਪਰ ਨਾਲ ਹੀ ਉਨ੍ਹਾਂ ਕਿਹਾ ਕਿ ਨਿਊਜੀਲੈਂਡ ‘ਕਾਨੂੰਨੀ ਬੋਲਣ ਦੀ ਆਜ਼ਾਦੀ’ ਦਾ ਸਮਰਥਨ ਕਰਦਾ ਹੈ।
ਉਨ੍ਹਾਂ ਕਿਹਾ ਕਿ ਮੈਂ ਉਸ ਮੁੱਦੇ ਨੂੰ ਸਮਝਦਾ ਹਾਂ ਜੋ ਉਹ ਚੁੱਕ ਰਹੇ ਹਨ, ਪਰ ਫਿਰ ਵੀ, ਨਿਊਜ਼ੀਲੈਂਡ ਦੇ ਦ੍ਰਿਸ਼ਟੀਕੋਣ ਤੋਂ, ਸਾਡੇ ਕੋਲ ਬੋਲਣ ਦੀ ਆਜ਼ਾਦੀ ਦੇ ਬਹੁਤ ਮਜ਼ਬੂਤ ਕਾਨੂੰਨ ਹਨ ਅਤੇ ਸਾਡੇ ਕੋਲ ਇੱਕ ਬਹੁਤ ਵਧੀਆ ਪੁਲਿਸ ਫੋਰਸ ਹੈ।
ਲਕਸਨ ਨੇ ਕਿਹਾ ਕਿ ਉਸਨੇ ਮੋਦੀ ਨੂੰ ਸਰਕਾਰੀ ਸਹਾਇਤਾ ਦੀ ਪੇਸ਼ਕਸ਼ ਨਹੀਂ ਕੀਤੀ ਸੀ ਜਿਸਦਾ ਜ਼ਿਕਰ ਮੋਦੀ ਦੀਆਂ ਜਨਤਕ ਟਿੱਪਣੀਆਂ ਵਿੱਚ ਕੀਤਾ ਗਿਆ ਸੀ।
ਵਿਰੋਧੀ ਸਥਿਤੀਆਂ ਦੇ ਬਾਵਜੂਦ, ਲਕਸਨ ਨੇ ਕਿਹਾ ਕਿ ਇਸ ਮੁੱਦੇ ਨੇ ਦੋਵਾਂ ਦੇਸ਼ਾਂ ਦੇ ਸਬੰਧਾਂ ‘ਤੇ ਨਕਾਰਾਤਮਕ ਪ੍ਰਭਾਵ ਨਹੀਂ ਪਾਇਆ ਹੈ।
