ਮੈਲਬਰਨ (ਹਰਪ੍ਰੀਤ ਸਿੰਘ) – ਐਤਵਾਰ ਨੂੰ ਹੋਏ ਮੈਲਬਰਨ ਮੈਰਾਥਨ ਫੈਸਟਿਵਲ ਨੇ ਇਸ ਸਾਲ ਨਵਾਂ ਰਿਕਾਰਡ ਬਣਾਇਆ — 50 ਹਜ਼ਾਰ ਦੌੜਾਕਾਂ ਨੇ ਹਿੱਸਾ ਲਿਆ, ਜੋ ਪਿਛਲੇ ਸਾਲ ਦੇ ਮੁਕਾਬਲੇ 8 ਹਜ਼ਾਰ ਵੱਧ ਸੀ। ਸਵੇਰੇ ਤੜਕੇ ਸ਼ੁਰੂ ਹੋਈ ਇਸ ਦੌੜ ‘ਚ ਓਲੰਪਿਕ ਖਿਡਾਰੀਆਂ, ਏਐਫਐਲ ਲੈਜੰਡਾਂ, ਸੋਸ਼ਲ ਮੀਡੀਆ ਇਨਫਲੂਐਂਸਰਾਂ ਅਤੇ ਆਮ ਆਸਟ੍ਰੇਲੀਆਈਆਂ ਨੇ ਭਾਗ ਲਿਆ। ਸਾਰੇ ਦੌੜਾਕਾਂ ਨੇ ਆਪਣੀ ਦੌੜ ਮੈਲਬਰਨ ਕ੍ਰਿਕਟ ਗਰਾਊਂਡ (MCG) ‘ਤੇ ਖ਼ਤਮ ਕੀਤੀ।
*ਮਰਦਾਂ ਦੀ ਮੈਰਾਥਨ: ਜੈਕ ਰੇਨਰ ਦੀ ਦੂਜੀ ਲਗਾਤਾਰ ਜਿੱਤ*
ਮੈਲਬਰਨ ਦੇ ਜੈਕ ਰੇਨਰ ਨੇ ਮਰਦਾਂ ਦੀ ਮੈਰਾਥਨ ਦੂਜੇ ਸਾਲ ਲਗਾਤਾਰ ਜਿੱਤੀ, ਸਮਾਂ 2 ਘੰਟੇ, 15 ਮਿੰਟ ਅਤੇ 2 ਸਕਿੰਟ ਰਿਹਾ।
ਉਹ ਆਸਟ੍ਰੇਲੀਆ ਦੇ ਸਭ ਤੋਂ ਤੇਜ਼ ਮੈਰਾਥਨ ਟਾਈਮ ਤੋਂ ਕੇਵਲ 10 ਮਿੰਟ ਪਿੱਛੇ ਰਹੇ — ਇਹ ਰਿਕਾਰਡ ਇਸ ਸਾਲ ਸਿਡਨੀ ਮੈਰਾਥਨ ‘ਚ ਇਥੋਪੀਆਈ ਦੌੜਾਕ ਹੈਲੀਮੇਰੀਅਮ ਕਿਰੋਸ ਨੇ 2:06:06 ਨਾਲ ਬਣਾਇਆ ਸੀ। ਰੇਨਰ ਨੇ ਦੱਸਿਆ ਕਿ ਉਹ ਰੇਸ ਤੋਂ ਇੱਕ ਦਿਨ ਪਹਿਲਾਂ ਬੀਮਾਰ ਸਨ ਪਰ ਫਿਰ ਵੀ ਦੌੜ ਵਿੱਚ ਸ਼ਾਮਲ ਹੋਏ।
*ਮਹਿਲਾ ਮੈਰਾਥਨ: ਕੈਟਲਿਨ ਐਡਮਜ਼ ਦੀ ਸ਼ਾਨਦਾਰ ਪਹਿਲੀ ਜਿੱਤ*
ਕੈਟਲਿਨ ਐਡਮਜ਼ ਨੇ ਆਪਣੀ ਜ਼ਿੰਦਗੀ ਦੀ ਪਹਿਲੀ ਮੈਰਾਥਨ ਦੌੜ ਕੇ ਹੀ ਮਹਿਲਾ ਵਰਗ ‘ਚ ਜਿੱਤ ਦਰਜ ਕੀਤੀ, ਸਮਾਂ ਰਿਹਾ 2 ਘੰਟੇ, 30 ਮਿੰਟ ਅਤੇ 26 ਸਕਿੰਟ।
ਉਸਦੇ ਪਿਤਾ, ਸਾਥੀ, ਟੀਮਮੇਟ ਤੇ ਕੋਚ ਨੇ ਦੌੜ ਦੇ ਵੱਖ-ਵੱਖ ਹਿੱਸਿਆਂ ‘ਚ ਉਸਦਾ ਸਾਥ ਦਿੱਤਾ।
