ਮੇਲਬੋਰਨ (ਹਰਪ੍ਰੀਤ ਸਿੰਘ) – ਰਿਹਾਇਸ਼ੀ ਇਲਾਕਿਆਂ ‘ਚ ਗੱਡੀਆਂ ਦੀ ਸਪੀਡ ਲਿਮਟ 50 ਕਿਲੋਮੀਟਰ ਪ੍ਰਤੀ ਘੰਟਾ ਤੋਂ ਘਟਾ ਕੇ 30 ਕਿਲੋਮੀਟਰ ਪ੍ਰਤੀ ਘੰਟਾ ਕਰਨ ਦੀ ਵਿਵਾਦਤ ਯੋਜਨਾ ਨੂੰ ਹੁਣ ਇੱਕ ਨਵੀਂ ਯੂਨੀਵਰਸਿਟੀ ਸਟਡੀ ਦਾ ਸਮਰਥਨ ਮਿਲਿਆ ਹੈ। ਇਹ ਤਬਦੀਲੀਆਂ ਪਹਿਲਾਂ ਸੱਤ ਸਾਲਾਂ ਲਈ ਟਰਾਇਲ ਅਧੀਨ ਚਲਦੀਆਂ ਰਹੀਆਂ, ਜਦ ਸਥਾਨਕ ਕੌਂਸਲਾਂ ਨੂੰ ਸਪੀਡ ਘਟਾਉਣ ਦੀ ਮਨਜ਼ੂਰੀ ਦਿੱਤੀ ਗਈ ਸੀ। ਹੁਣ ਵਿਕਟੋਰੀਆ ਸਰਕਾਰ ਨੇ ਇਸ ਨਿਯਮ ਨੂੰ ਹੋਰ ਵਿਸ਼ਾਲ ਪੱਧਰ ‘ਤੇ ਲਾਗੂ ਕਰਨ ਦੀ ਇਜਾਜ਼ਤ ਦੇ ਦਿੱਤੀ ਹੈ।
ਆਰਐਮਆਈਟੀ ਯੂਨੀਵਰਸਿਟੀ ਦੇ ਸੈਂਟਰ ਫਾਰ ਅਰਬਨ ਰਿਸਰਚ ਦੀ ਸਟਡੀ ਮੁਤਾਬਕ, ਜਦੋਂ ਸਪੀਡ ਲਿਮਟ 50 ਤੋਂ ਘਟਾ ਕੇ 30 ਕਿਲੋਮੀਟਰ ਪ੍ਰਤੀ ਘੰਟਾ ਕੀਤੀ ਗਈ, ਤਾਂ ਸਾਈਕਲ ਚਲਾਉਣ ਵਾਲਿਆਂ ਦੀ ਉੱਚ ਟ੍ਰੈਫਿਕ ਵਾਲੇ ਰੋਡਾਂ ਨਾਲ ਸਾਂਝ 30 ਪ੍ਰਤੀਸ਼ਤ ਘੱਟੀ। ਟਰਾਂਸਪੋਰਟ ਵਿਕਟੋਰੀਆ ਦੇ ਅੰਕੜਿਆਂ ਅਨੁਸਾਰ, ਜੇ ਕੋਈ ਪੈਦਲ ਯਾਤਰੀ 50 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਆਉਣ ਵਾਲੀ ਕਾਰ ਨਾਲ ਟਕਰਾਏ, ਤਾਂ ਉਸਦੀ ਬਚਣ ਦੀ ਸੰਭਾਵਨਾ ਸਿਰਫ਼ 10 ਪ੍ਰਤੀਸ਼ਤ ਰਹਿੰਦੀ ਹੈ। ਰਿਸਰਚਰਾਂ ਦਾ ਕਹਿਣਾ ਹੈ ਕਿ ਭਾਵੇਂ 30 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਕੁਝ ਡਰਾਈਵਰਾਂ ਲਈ “ਧੀਮੀ ਤੇ ਚਿੜਚਿੜੀ” ਲੱਗ ਸਕਦੀ ਹੈ, ਪਰ ਮਾਡਲਿੰਗ ਦਿਖਾਉਂਦੀ ਹੈ ਕਿ ਇਸ ਨਾਲ ਟ੍ਰੈਫਿਕ ਦੇ ਬਹਾਅ ‘ਤੇ ਕੋਈ ਵੱਡਾ ਅਸਰ ਨਹੀਂ ਪਵੇਗਾ।
