ਮੈਲਬੋਰਨ (ਹਰਪ੍ਰੀਤ ਸਿੰਘ) – ਮੰਗਲਵਾਰ ਸਵੇਰੇ ਮੈਲਬਰਨ ਦੇ ਡੈਂਡਿਨੌਂਗ ਇਲਾਕੇ ਵਿੱਚ ਇੱਕ BP ਪੈਟਰੋਲ ਸਟੇਸ਼ਨ ਬਾਹਰ ਛੁਰੇਬਾਜ਼ੀ ਦੀ ਘਟਨਾ ਵਿੱਚ 39 ਸਾਲਾ ਵਿਅਕਤੀ ਦੀ ਮੌਤ ਹੋਣ ਦੀ ਖਬਰ ਹੈ। ਪ੍ਰਿੰਸੇਜ਼ ਹਾਈਵੇ ਤੇ ਗਸ਼ਤ ਕਰ ਰਹੇ ਅਧਿਕਾਰੀਆਂ ਨੇ ਉਸਨੂੰ ਜ਼ਮੀਨ ‘ਤੇ ਡਿੱਗਦਾ ਦੇਖਿਆ ਅਤੇ ਤੁਰੰਤ ਮਦਦ ਲਈ ਦੌੜੇ। ਉਨ੍ਹਾਂ ਵੱਲੋਂ ਤੁਰੰਤ ਮੈਡੀਕਲ ਸਹਾਇਤਾ ਦਿੱਤੀ ਗਈ, ਪਰ ਪੈਰਾਮੈਡਿਕਸ ਦੇ ਆਉਣ ਤੋਂ ਪਹਿਲਾਂ ਹੀ ਨੌਜਵਾਨ ਨੇ ਦਮ ਤੋੜ ਦਿੱਤਾ।
ਪੀੜਤ ਦੀ ਅਜੇ ਤੱਕ ਸਰਕਾਰੀ ਪਛਾਣ ਨਹੀਂ ਹੋਈ ਹੈ। ਪੁਲਿਸ ਹੁਣ ਹੋਮਿਸਾਈਡ ਜਾਂਚ ਕਰ ਰਹੀ ਹੈ ਅਤੇ ਉਹਨਾਂ ਅਧਿਕਾਰੀਆਂ ਨਾਲ ਗੱਲ ਕਰ ਰਹੀ ਹੈ ਜੋ ਸਭ ਤੋਂ ਪਹਿਲਾਂ ਮੌਕੇ ‘ਤੇ ਪਹੁੰਚੇ ਸਨ, ਤਾਂ ਜੋ ਪਤਾ ਲੱਗ ਸਕੇ ਕਿ ਮਰਨ ਤੋਂ ਪਹਿਲਾਂ ਪੀੜਤ ਨੇ ਕੁਝ ਕਿਹਾ ਸੀ ਜਾਂ ਨਹੀਂ। ਨਜ਼ਦੀਕ ਇੱਕ ਫ਼ੋਨ ਵੀ ਮਿਲਿਆ ਹੈ, ਪਰ ਹਾਲੇ ਇਹ ਸਪੱਸ਼ਟ ਨਹੀਂ ਕਿ ਇਸਦਾ ਸਬੰਧ ਘਟਨਾ ਨਾਲ ਹੈ ਜਾਂ ਨਹੀਂ।
