ਆਕਲੈਂਡ (NZ Punjabi News) – ਨਿਊਜ਼ੀਲੈਂਡ ਪੁਲਿਸ ਨੇ 20 ਸਾਲਾ ਮੁਟਿਆਰ Wolvedi Ding ਦੀ ਭਾਲ ਲਈ ਲੋਕਾਂ ਤੋਂ ਮਦਦ ਦੀ ਅਪੀਲ ਕੀਤੀ ਹੈ। ਡਿੰਗ ਨੂੰ ਆਖਰੀ ਵਾਰ ਸ਼ੁੱਕਰਵਾਰ, 17 ਜੁਲਾਈ 2026 ਨੂੰ ਸਵੇਰੇ ਕਰੀਬ 8:20 ਵਜੇ ਵੈਸਟ ਆਕਲੈਂਡ ਦੇ ਬਰਡਵੁੱਡ ਰੋਡ, ਸਵਾਨਸਨ (Birdwood Road, Swanson) ‘ਤੇ ਪੈਦਲ ਜਾਂਦੇ ਹੋਏ ਦੇਖਿਆ ਗਿਆ ਸੀ। ਉਸ ਸਮੇਂ ਉਸ ਨੇ ਸਲੇਟੀ (ਗ੍ਰੇ) ਰੰਗ ਦੀ ਹੁੱਡੀ, ਕਾਲੀ ਪੈਂਟ ਅਤੇ ਕਾਲੇ ਜੁੱਤੇ ਪਹਿਨੇ ਹੋਏ ਸਨ ਅਤੇ ਉਸ ਦੇ ਹੱਥ ਵਿੱਚ ਪਾਰਦਰਸ਼ੀ (ਕਲੀਅਰ) ਛਤਰੀ ਸੀ। ਪੁਲਿਸ ਨੇ ਦੱਸਿਆ ਕਿ ਉਸ ਦੀਆਂ ਅੱਖਾਂ ਭੂਰੇ ਰੰਗ ਦੀਆਂ ਹਨ ਅਤੇ ਇਸ ਸਮੇਂ ਉਸ ਦੇ ਵਾਲ ਬਹੁਤ ਛੋਟੇ ਹਨ, ਜੋ ਜਾਰੀ ਕੀਤੀ ਗਈ ਤਸਵੀਰ ਨਾਲੋਂ ਕਾਫ਼ੀ ਛੋਟੇ ਹਨ।
ਪੁਲਿਸ ਮੁਤਾਬਕ, ਡਿੰਗ ਆਕਲੈਂਡ ਦੇ ਸੈਂਟਰਲ ਸਿਟੀ (CBD) ਵਿੱਚ ਰਹਿੰਦੀ ਹੈ, ਪਰ ਲਾਪਤਾ ਹੋਣ ਤੋਂ ਪਹਿਲਾਂ ਉਹ ਵੈਸਟ ਆਕਲੈਂਡ ਵਿੱਚ ਆਪਣੇ ਪਰਿਵਾਰ ਨੂੰ ਮਿਲਣ ਗਈ ਹੋਈ ਸੀ। ਕਈ ਕੋਸ਼ਿਸ਼ਾਂ ਦੇ ਬਾਵਜੂਦ ਨਾ ਤਾਂ ਪਰਿਵਾਰ ਅਤੇ ਨਾ ਹੀ ਪੁਲਿਸ ਦਾ ਉਸ ਨਾਲ ਕੋਈ ਸੰਪਰਕ ਹੋ ਸਕਿਆ ਹੈ, ਜਿਸ ਕਾਰਨ ਉਸ ਦੀ ਸੁਰੱਖਿਆ ਨੂੰ ਲੈ ਕੇ ਚਿੰਤਾ ਵਧ ਗਈ ਹੈ। ਪੁਲਿਸ ਨੇ ਅਪੀਲ ਕੀਤੀ ਹੈ ਕਿ ਜੇਕਰ ਕਿਸੇ ਨੇ ਵੋਲਵੇਦੀ ਡਿੰਗ ਨੂੰ ਦੇਖਿਆ ਹੈ ਜਾਂ ਉਸ ਬਾਰੇ ਕੋਈ ਵੀ ਜਾਣਕਾਰੀ ਹੈ, ਤਾਂ ਤੁਰੰਤ ਨਿਊਜ਼ੀਲੈਂਡ ਪੁਲਿਸ ਨਾਲ ਸੰਪਰਕ ਕੀਤਾ ਜਾਵੇ।
