ਆਕਲੈਂਡ (NZ Punjabi News) – ਆਕਲੈਂਡ ਕੌਂਸਲ ਦੇ ਕੌਂਸਲਰਾਂ ਨੇ Watercare ਦੇ ਬੋਰਡ ਮੈਂਬਰਾਂ ਦੀ ਫੀਸ ਵਿੱਚ 33 ਫ਼ੀਸਦੀ ਵਾਧੇ ਦੀ ਤਜਵੀਜ਼ ਰੱਦ ਕਰ ਦਿੱਤੀ ਹੈ। ਇਹ ਫ਼ੈਸਲਾ ਉਸ ਵੇਲੇ ਆਇਆ ਹੈ ਜਦੋਂ 1 ਜੁਲਾਈ ਤੋਂ ਪਾਣੀ ਅਤੇ ਗੰਦੇ ਪਾਣੀ ਦੇ ਬਿੱਲਾਂ ਵਿੱਚ 7.2 ਫ਼ੀਸਦੀ ਵਾਧਾ ਹੋ ਚੁੱਕਾ ਹੈ। ਕੌਂਸਲ ਅਧਿਕਾਰੀਆਂ ਦਾ ਕਹਿਣਾ ਸੀ ਕਿ Watercare ਦੀਆਂ ਜ਼ਿੰਮੇਵਾਰੀਆਂ ਵਧਣ ਕਾਰਨ ਇਹ ਵਾਧਾ ਜਾਇਜ਼ ਹੈ, ਪਰ ਕੌਂਸਲਰਾਂ ਨੇ ਇਸ ਨੂੰ ਲੋਕਾਂ ਲਈ ਗੈਰ-ਵਾਜਬ ਕਰਾਰ ਦਿੱਤਾ।
ਕਮੇਟੀ ਦੇ ਚੇਅਰਮੈਨ ਡੈਨੀਅਲ ਨਿਊਮੈਨ ਨੇ ਕਿਹਾ ਕਿ ਉਹ ਫੀਸਾਂ ਵਿੱਚ ਮਾਮੂਲੀ ਵਾਧੇ ਦੀ ਉਮੀਦ ਕਰ ਰਹੇ ਸਨ, ਪਰ 33 ਫ਼ੀਸਦੀ ਵਾਧਾ ਕਬੂਲਯੋਗ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਮੈਨਿਊਰੇਵਾ ਅਤੇ ਪਾਪਾਕੂਰਾ ਵਰਗੇ ਇਲਾਕਿਆਂ ਵਿੱਚ ਕਈ ਪਰਿਵਾਰ ਪਹਿਲਾਂ ਹੀ ਮਹਿੰਗਾਈ ਅਤੇ ਵਧਦੇ ਖਰਚਿਆਂ ਨਾਲ ਜੂਝ ਰਹੇ ਹਨ, ਇਸ ਲਈ ਅਜਿਹਾ ਵਾਧਾ ਲੋਕਾਂ ਦੀਆਂ ਭਾਵਨਾਵਾਂ ਦੇ ਉਲਟ ਹੈ।
Watercare ਨੇ ਸਪੱਸ਼ਟ ਕੀਤਾ ਹੈ ਕਿ ਪਾਣੀ ਦੇ ਬਿੱਲਾਂ ਵਿੱਚ ਵਾਧਾ ਬੋਰਡ ਮੈਂਬਰਾਂ ਦੀ ਫੀਸ ਲਈ ਨਹੀਂ, ਸਗੋਂ ਆਉਂਦੇ 10 ਸਾਲਾਂ ਵਿੱਚ 13.8 ਬਿਲੀਅਨ ਡਾਲਰ ਦੇ ਪਾਣੀ ਅਤੇ ਗੰਦੇ ਪਾਣੀ ਦੇ ਬੁਨਿਆਦੀ ਢਾਂਚੇ ਦੇ ਵਿਕਾਸ ਲਈ ਕੀਤਾ ਗਿਆ ਹੈ। ਹੁਣ 33 ਫ਼ੀਸਦੀ ਵਾਧੇ ਦੀ ਥਾਂ ਘੱਟ ਵਾਧੇ ਵਾਲੇ ਨਵੇਂ ਪ੍ਰਸਤਾਵ ਤਿਆਰ ਕਰਕੇ ਕੌਂਸਲ ਅੱਗੇ ਰੱਖੇ ਜਾਣਗੇ।
