ਆਕਲੈਂਡ (NZ Punjabi News) — ਲੇਬਰ ਆਗੂ Chris Hipkins ਨੇ National ਪਾਰਟੀ ਅੰਦਰ ਚੱਲ ਰਹੀ ਲੀਡਰਸ਼ਿਪ ਨੂੰ ਲੈ ਕੇ ਅਨਿਸ਼ਚਿਤਤਾ ਨੂੰ ਨਿਸ਼ਾਨਾ ਬਣਾਉਂਦਿਆਂ ਦੋਸ਼ ਲਗਾਇਆ ਹੈ ਕਿ ਸਰਕਾਰ ਨਿਊਜ਼ੀਲੈਂਡ ਵਾਸੀਆਂ ਦੀਆਂ ਸਮੱਸਿਆਵਾਂ ਦੀ ਬਜਾਏ ਆਪਣੀਆਂ ਅੰਦਰੂਨੀ ਸਿਆਸੀ ਲੜਾਈਆਂ ਵਿੱਚ ਜ਼ਿਆਦਾ ਉਲਝੀ ਹੋਈ ਹੈ।
ਮੰਗਲਵਾਰ ਦੁਪਹਿਰ ਮੀਡੀਆ ਨਾਲ ਗੱਲ ਕਰਦਿਆਂ ਹਿਪਕਿਨਜ਼ ਨੇ ਕਿਹਾ ਕਿ Christopher Luxon ਦੇ ਭਵਿੱਖ ਨੂੰ ਲੈ ਕੇ ਮੁੜ ਉੱਠੀਆਂ ਚਰਚਾਵਾਂ ਦਿਖਾਉਂਦੀਆਂ ਹਨ ਕਿ National ਪਾਰਟੀ ਇੱਕ ਵਾਰ ਫਿਰ ਇਸ ਗੱਲ ਵਿੱਚ ਉਲਝੀ ਹੋਈ ਹੈ ਕਿ ਪਾਰਟੀ ਦੀ ਅਗਵਾਈ ਕੌਣ ਕਰੇਗਾ।
ਹਿਪਕਿਨਜ਼ ਨੇ ਕਿਹਾ, “ਇੱਕ ਵਾਰ ਫਿਰ National Party ਆਪਸ ਵਿੱਚ ਲੜਨ ਵਿੱਚ ਰੁੱਝੀ ਹੋਈ ਹੈ, ਬਜਾਏ ਇਸ ਦੇ ਕਿ ਉਹ ਉਨ੍ਹਾਂ ਮੁੱਦਿਆਂ ’ਤੇ ਧਿਆਨ ਦੇਵੇ ਜਿਨ੍ਹਾਂ ਨੂੰ ਨਿਊਜ਼ੀਲੈਂਡ ਦੇ ਲੋਕ ਸਰਕਾਰ ਤੋਂ ਹੱਲ ਕਰਵਾਉਣਾ ਚਾਹੁੰਦੇ ਹਨ।” ਇਸ ਤੋਂ ਬਾਅਦ ਉਨ੍ਹਾਂ ਨੇ Luxon ਦੇ ਆਪਣੇ ਪੁਰਾਣੇ ਬਿਆਨ ਨੂੰ ਹੀ ਉਨ੍ਹਾਂ ਖ਼ਿਲਾਫ਼ ਵਰਤਦਿਆਂ ਕਿਹਾ, “ਜਿਵੇਂ Christopher Luxon ਖੁਦ ਕਹਿ ਚੁੱਕੇ ਹਨ, ਜੇ ਤੁਸੀਂ ਆਪਣੇ ਆਪ ਨੂੰ ਨਹੀਂ ਸੰਭਾਲ ਸਕਦੇ ਤਾਂ ਤੁਸੀਂ ਦੇਸ਼ ਨਹੀਂ ਚਲਾ ਸਕਦੇ।”
ਇਹ ਟਿੱਪਣੀਆਂ ਉਸ ਸਮੇਂ ਆਈਆਂ ਹਨ ਜਦੋਂ Luxon ਨੇ ਬੁੱਧਵਾਰ ਸਵੇਰੇ National caucus ਦੀ ਤੁਰੰਤ ਆਹਮੋ-ਸਾਹਮਣੇ ਮੀਟਿੰਗ ਬੁਲਾਈ ਹੈ। ਪਾਰਟੀ ਅੰਦਰ ਉਨ੍ਹਾਂ ਦੀ ਲੀਡਰਸ਼ਿਪ ਨੂੰ ਲੈ ਕੇ ਚੱਲ ਰਹੀਆਂ ਅਟਕਲਾਂ ਕਾਰਨ ਇਸ ਮੀਟਿੰਗ ਨੂੰ ਅਹਿਮ ਮੰਨਿਆ ਜਾ ਰਿਹਾ ਹੈ।
ਜਦੋਂ ਹਿਪਕਿਨਜ਼ ਤੋਂ ਪੁੱਛਿਆ ਗਿਆ ਕਿ ਚੋਣਾਂ ਤੋਂ ਪਹਿਲਾਂ National ਵੱਲੋਂ Luxon ਦੀ ਥਾਂ ਨਵਾਂ ਆਗੂ ਲਿਆਉਣ ਨਾਲ Labour ਨੂੰ ਸਿਆਸੀ ਨੁਕਸਾਨ ਹੋ ਸਕਦਾ ਹੈ, ਤਾਂ ਉਨ੍ਹਾਂ ਨੇ ਇਸ ਸੰਭਾਵਨਾ ਨੂੰ ਖਾਰਜ ਕਰ ਦਿੱਤਾ। ਉਨ੍ਹਾਂ ਕਿਹਾ ਕਿ “ਇਸ ਨਾਲ ਕੋਈ ਫਰਕ ਨਹੀਂ ਪੈਂਦਾ ਕਿ National Party ਦੀ ਅਗਵਾਈ ਕੌਣ ਕਰਦਾ ਹੈ”, ਕਿਉਂਕਿ ਸਿਰਫ਼ ਆਗੂ ਬਦਲਣ ਨਾਲ ਸਰਕਾਰ ਦਾ ਰਿਕਾਰਡ ਨਹੀਂ ਬਦਲੇਗਾ।
ਹਿਪਕਿਨਜ਼ ਨੇ ਕਿਹਾ ਕਿ “National Party ਆਪਣੇ ਹੀ ਅਹੁਦਿਆਂ ਅਤੇ ਨੌਕਰੀਆਂ ਨੂੰ ਲੈ ਕੇ ਚਿੰਤਤ ਹੈ।” ਉਨ੍ਹਾਂ ਅੱਗੇ ਕਿਹਾ ਕਿ National ਪਾਰਟੀ ਦੇ ਸਿਖਰ ’ਤੇ ਆਗੂ ਬਦਲਣ ਨਾਲ ਵੀ ਸਰਕਾਰ ਦੇ “ਨਿਰਾਸ਼ਾਜਨਕ ਰਿਕਾਰਡ” ਨੂੰ ਛੁਪਾਇਆ ਨਹੀਂ ਜਾ ਸਕਦਾ।
