ਆਕਲੈਂਡ (NZ Punjabi News) – ਬੇਅ ਆਫ਼ ਪਲੈਂਟੀ ਦੀ ਇੱਕ ਬਾਗਬਾਨੀ ਮਜ਼ਦੂਰ ਸਪਲਾਈ ਕੰਪਨੀ ਅਤੇ ਇਸ ਦੇ ਸਾਬਕਾ ਡਾਇਰੈਕਟਰ ਨੂੰ ਚਾਰ ਭਾਰਤੀ ਪ੍ਰਵਾਸੀ ਮਜ਼ਦੂਰਾਂ ਦੇ ਸ਼ੋਸ਼ਣ ਦੇ ਮਾਮਲੇ ਵਿੱਚ ਕਰੀਬ $4 ਲੱਖ ਅਦਾ ਕਰਨ ਦਾ ਹੁਕਮ ਦਿੱਤਾ ਗਿਆ ਹੈ। ਚਾਰਾਂ ਮਜ਼ਦੂਰਾਂ ਨੂੰ $33,000-33,000 ਮਿਲਣਗੇ।
ਮਾਮਲਾ ਇੰਡੋ ਕੀਵੀ ਹਾਰਟੀਕਲਚਰ ਲਿਮਟਿਡ ਅਤੇ ਇਸ ਦੇ ਸਾਬਕਾ ਇਕਲੌਤੇ ਡਾਇਰੈਕਟਰ ਬੂਟਾ ਸਿੰਘ ਢਿੱਲੋਂ ਨਾਲ ਸਬੰਧਤ ਹੈ। ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਮਜ਼ਦੂਰਾਂ ਨੂੰ ਘੱਟ ਤਨਖਾਹ ਦਿੱਤੀ ਗਈ, ਛੁੱਟੀਆਂ ਦੀ ਬਣਦੀ ਰਕਮ ਨਹੀਂ ਦਿੱਤੀ ਗਈ ਅਤੇ ਕੁਝ ਮਾਮਲਿਆਂ ਵਿੱਚ ਨੌਕਰੀ ਹਾਸਲ ਕਰਨ ਜਾਂ ਜਾਰੀ ਰੱਖਣ ਲਈ ਉਨ੍ਹਾਂ ਤੋਂ ਪੈਸੇ ਵੀ ਲਏ ਗਏ।
ਇਹ ਚਾਰੋਂ ਭਾਰਤੀ ਨਾਗਰਿਕ ਨਿਊਜ਼ੀਲੈਂਡ ਵਿੱਚ ਸਿਰਫ਼ ਇਸ ਕੰਪਨੀ ਲਈ ਕੰਮ ਕਰਨ ਵਾਲੇ ਖਾਸ ਵੀਜ਼ਿਆਂ ’ਤੇ ਸਨ। ਅਧਿਕਾਰੀਆਂ ਨੇ ਕਿਹਾ ਕਿ ਇਸ ਕਾਰਨ ਉਨ੍ਹਾਂ ਦੀ ਕੰਪਨੀ ’ਤੇ ਨਿਰਭਰਤਾ ਅਤੇ ਇਮੀਗ੍ਰੇਸ਼ਨ ਸਥਿਤੀ ਨੇ ਉਨ੍ਹਾਂ ਨੂੰ ਹੋਰ ਵੀ ਕਮਜ਼ੋਰ ਬਣਾ ਦਿੱਤਾ ਸੀ। ਤਿੰਨ ਮਜ਼ਦੂਰਾਂ ਨੇ ਮਿਲ ਕੇ $65,000 ਤੋਂ ਵੱਧ ਰਕਮ ਨੌਕਰੀ ਨਾਲ ਜੁੜੇ ਭੁਗਤਾਨਾਂ ਵਜੋਂ ਦਿੱਤੀ ਸੀ।
ਰੋਜ਼ਗਾਰ ਸਬੰਧ ਅਥਾਰਟੀ ਨੇ ਕੰਪਨੀ ਨੂੰ $176,000 ਜੁਰਮਾਨਾ ਅਤੇ $152,000 ਤੋਂ ਵੱਧ ਬਕਾਇਆ ਤਨਖਾਹ, ਛੁੱਟੀਆਂ ਦੀ ਰਕਮ ਅਤੇ ਗੈਰ-ਕਾਨੂੰਨੀ ਭੁਗਤਾਨਾਂ ਲਈ ਦੇਣ ਦਾ ਹੁਕਮ ਦਿੱਤਾ। ਬੂਟਾ ਸਿੰਘ ਢਿੱਲੋਂ ਨੂੰ ਨਿੱਜੀ ਤੌਰ ’ਤੇ ਹੋਰ $88,000 ਜੁਰਮਾਨਾ ਕੀਤਾ ਗਿਆ। ਲੇਬਰ ਇੰਸਪੈਕਟੋਰੇਟ ਨੇ ਕਿਹਾ ਕਿ ਮਾਲਕਾਂ ਵੱਲੋਂ ਨੌਕਰੀ ਦੇ ਬਦਲੇ ਮਜ਼ਦੂਰਾਂ ਤੋਂ ਪੈਸੇ ਮੰਗਣਾ ਗੈਰ-ਕਾਨੂੰਨੀ ਹੈ।
ਬੂਟਾ ਸਿੰਘ ਢਿੱਲੋਂ ਨੇ ਅਕਤੂਬਰ 2024 ਵਿੱਚ ਕੰਪਨੀ ਵੇਚ ਦਿੱਤੀ ਸੀ ਅਤੇ ਹੁਣ ਇਹ ਕਾਰੋਬਾਰ ਚੱਲ ਨਹੀਂ ਰਿਹਾ। ਇਹ ਮਾਮਲਾ ਨਿਊਜ਼ੀਲੈਂਡ ਦੇ ਬਾਗਬਾਨੀ ਖੇਤਰ ਵਿੱਚ ਪ੍ਰਵਾਸੀ ਮਜ਼ਦੂਰਾਂ ਦੇ ਰੁਜ਼ਗਾਰ ਅਧਿਕਾਰਾਂ ਨੂੰ ਲੈ ਕੇ ਵਧ ਰਹੀ ਜਾਂਚ ਦੇ ਵਿਚਕਾਰ ਸਾਹਮਣੇ ਆਇਆ ਹੈ।
