ਆਕਲੈਂਡ (NZ Punjabi News): ਨਿਊਜ਼ੀਲੈਂਡ ਦੇ TSB ਬੈਂਕ ਨੇ ਹਜ਼ਾਰਾਂ ਬਿਜ਼ਨਸ ਗਾਹਕਾਂ ਤੋਂ ਗਲਤ ਤਰੀਕੇ ਨਾਲ ਵਸੂਲ ਕੀਤੀਆਂ ਫੀਸਾਂ ਦੇ ਬਦਲੇ ਕੁੱਲ $1.73 ਮਿਲੀਅਨ ਵਾਪਸ ਕੀਤੇ ਹਨ। Financial Markets Authority (FMA) ਮੁਤਾਬਕ ਇਸ ਗਲਤੀ ਨਾਲ 7,309 ਗਾਹਕ ਖਾਤੇ ਪ੍ਰਭਾਵਿਤ ਹੋਏ।
ਮਾਮਲਾ ਬਿਜ਼ਨਸ ਚੈੱਕ ਟ੍ਰਾਂਜ਼ੈਕਸ਼ਨਾਂ ’ਤੇ ਲਗਾਈ ਜਾ ਰਹੀ 25 ਸੈਂਟ ਦੀ ਫੀਸ ਨਾਲ ਸਬੰਧਤ ਹੈ। FMA ਮੁਤਾਬਕ ਕੁਝ ਅਜਿਹੇ ਟ੍ਰਾਂਜ਼ੈਕਸ਼ਨਾਂ ’ਤੇ ਵੀ ਇਹ ਫੀਸ ਲਈ ਗਈ ਜਿਨ੍ਹਾਂ ’ਤੇ TSB ਦੀਆਂ ਆਪਣੀਆਂ Terms and Conditions ਅਨੁਸਾਰ ਕੋਈ ਫੀਸ ਨਹੀਂ ਲੱਗਣੀ ਚਾਹੀਦੀ ਸੀ। ਇਹ ਗਲਤ ਚਾਰਜਿੰਗ 30 ਨਵੰਬਰ 2017 ਤੋਂ 20 ਨਵੰਬਰ 2023 ਤੱਕ ਲਗਭਗ ਛੇ ਸਾਲ ਚੱਲੀ।
FMA ਨੇ TSB ਖ਼ਿਲਾਫ਼ ਜਨਤਕ ਚੇਤਾਵਨੀ ਜਾਰੀ ਕੀਤੀ ਹੈ। FMA ਮੁਤਾਬਕ TSB ਨੇ ਨਵੰਬਰ 2017 ਵਿੱਚ ਆਪਣੇ Business Cheque Terms and Conditions ਵਿੱਚ ਬਦਲਾਅ ਕੀਤਾ ਸੀ ਤਾਂ ਜੋ ਫੀਸਾਂ ਨੂੰ ਹੋਰ ਸਪਸ਼ਟ ਕੀਤਾ ਜਾ ਸਕੇ। ਪਰ ਕੁਝ ਟ੍ਰਾਂਜ਼ੈਕਸ਼ਨਾਂ ਨੂੰ ਨਵੀਆਂ ਸ਼ਰਤਾਂ ਵਿੱਚੋਂ ਹਟਾਉਣ ਦੇ ਬਾਵਜੂਦ ਬੈਂਕ ਦੇ ਸਿਸਟਮ ਉਨ੍ਹਾਂ ’ਤੇ ਫੀਸ ਲਗਾਉਂਦੇ ਰਹੇ।
FMA ਦੀ Acting Head of Perimeter and Response ਟ੍ਰਿਸ਼ ਮਿਲਵਰਡ ਨੇ ਕਿਹਾ ਕਿ ਗਾਹਕਾਂ ਕੋਲ ਇਸ ਗਲਤੀ ਨੂੰ ਖੁਦ ਪਛਾਣਨ ਦਾ ਕੋਈ ਵਿਹਾਰਕ ਤਰੀਕਾ ਨਹੀਂ ਸੀ ਅਤੇ ਗਲਤ ਫੀਸਾਂ ਲਗਭਗ ਛੇ ਸਾਲ ਤੱਕ ਵਸੂਲ ਹੁੰਦੀਆਂ ਰਹੀਆਂ। ਉਨ੍ਹਾਂ ਕਿਹਾ ਕਿ ਬੈਂਕਾਂ ਨੂੰ ਇਹ ਯਕੀਨੀ ਬਣਾਉਣਾ ਚਾਹੀਦਾ ਹੈ ਕਿ Terms and Conditions ਵਿੱਚ ਕੀਤੇ ਬਦਲਾਅ ਉਨ੍ਹਾਂ ਦੇ ਸਿਸਟਮਾਂ ਵਿੱਚ ਵੀ ਸਹੀ ਤਰੀਕੇ ਨਾਲ ਲਾਗੂ ਹੋਣ।
TSB ਦੇ ਮੁੱਖ ਕਾਰਜਕਾਰੀ ਕੇਰੀ ਬੋਇਲ ਨੇ ਗਲਤੀ ਲਈ ਪ੍ਰਭਾਵਿਤ ਗਾਹਕਾਂ ਤੋਂ ਮੁਆਫ਼ੀ ਮੰਗੀ ਹੈ। ਬੈਂਕ ਮੁਤਾਬਕ ਪ੍ਰਭਾਵਿਤ ਗਾਹਕਾਂ ਨੂੰ ਰਕਮ ਵਾਪਸ ਕੀਤੀ ਜਾ ਚੁੱਕੀ ਹੈ ਅਤੇ ਫੀਸਾਂ ਦੀ ਸਹੀ ਜਾਣਕਾਰੀ ਤੇ ਚਾਰਜਿੰਗ ਯਕੀਨੀ ਬਣਾਉਣ ਲਈ ਪ੍ਰਕਿਰਿਆਵਾਂ ਨੂੰ ਮਜ਼ਬੂਤ ਕੀਤਾ ਗਿਆ ਹੈ।
FMA ਦੇ ਅਨੁਸਾਰ ਕੁੱਲ $1,734,800 ਦੀ ਰਕਮ ਵਾਪਸ ਕੀਤੀ ਗਈ। ਇਸ ਵਿੱਚ $1,425,127 ਗਲਤ ਵਸੂਲ ਕੀਤੀਆਂ ਫੀਸਾਂ, $10,404 ਸਬੰਧਤ ਵਿਆਜ ਅਤੇ ਫੀਸਾਂ ਅਤੇ $299,269 ਪੈਸੇ ਦੀ ਵਰਤੋਂ ਲਈ ਮੁਆਵਜ਼ੇ ਵਜੋਂ ਸ਼ਾਮਲ ਹਨ। TSB ਨੇ ਅਗਸਤ 2023 ਵਿੱਚ ਅੰਦਰੂਨੀ ਤੌਰ ’ਤੇ ਇਸ ਸਮੱਸਿਆ ਦੀ ਪਛਾਣ ਕੀਤੀ ਸੀ ਅਤੇ 20 ਨਵੰਬਰ 2023 ਨੂੰ ਇਹ ਫੀਸ ਲਗਾਉਣੀ ਬੰਦ ਕਰ ਦਿੱਤੀ ਸੀ।
FMA ਨੇ ਕਿਹਾ ਕਿ TSB ਨੇ ਮਾਮਲਾ ਖੁਦ ਪਛਾਣ ਕੇ ਰਿਪੋਰਟ ਕੀਤਾ ਅਤੇ ਜਾਂਚ ਦੌਰਾਨ ਸਹਿਯੋਗ ਕੀਤਾ। ਹਾਲਾਂਕਿ, ਗਲਤ ਚਾਰਜਿੰਗ ਦੀ ਲੰਮੀ ਮਿਆਦ, ਪ੍ਰਭਾਵਿਤ ਗਾਹਕਾਂ ਦੀ ਗਿਣਤੀ ਅਤੇ FMA ਨੂੰ ਮਾਮਲਾ ਦੱਸਣ ਅਤੇ ਰਿਫੰਡ ਕਰਨ ਵਿੱਚ ਹੋਈ ਦੇਰੀ ਕਾਰਨ ਰੈਗੂਲੇਟਰ ਨੇ ਜਨਤਕ ਚੇਤਾਵਨੀ ਜਾਰੀ ਕੀਤੀ।
