ਆਕਲੈਂਡ (NZ Punjabi News) – ਨਿਊਜ਼ੀਲੈਂਡ ਵਿੱਚ ਡੇਵਿਡ ਜੋਨਸ (David Jones) ਦਾ ਇਕਲੌਤਾ ਸਟੋਰ ਵੀ ਬੰਦ ਹੋਣ ਜਾ ਰਿਹਾ ਹੈ। ਕੰਪਨੀ ਦੇ ਰਿਸੀਵਰਾਂ ਨੇ ਐਲਾਨ ਕੀਤਾ ਹੈ ਕਿ ਆਕਲੈਂਡ ਦੇ ਨਿਊਮਾਰਕਿਟ ਸਥਿਤ ਸਟੋਰ ਨੂੰ ਆਸਟ੍ਰੇਲੀਆ ਦੇ 18 ਹੋਰ ਸਟੋਰਾਂ ਸਮੇਤ ਬੰਦ ਕੀਤਾ ਜਾਵੇਗਾ।
FTI Consulting ਦੇ ਕ੍ਰਿਸਟੋਫਰ ਹਿੱਲ, ਡੇਵਿਡ ਮੈਕਗ੍ਰਾਥ ਅਤੇ ਜੋਐਨ ਡਨ ਨੇ 1News ਨੂੰ ਦਿੱਤੇ ਬਿਆਨ ਵਿੱਚ ਇਸ ਫੈਸਲੇ ਦੀ ਪੁਸ਼ਟੀ ਕੀਤੀ। ਉਨ੍ਹਾਂ ਦੱਸਿਆ ਕਿ ਕੰਪਨੀ ਦੇ ਭਵਿੱਖ ਲਈ ਪ੍ਰਬੰਧਕਾਂ ਵੱਲੋਂ ਪਹਿਲਾਂ ਤਿਆਰ ਕੀਤੀ ਗਈ ਯੋਜਨਾ ਦੇ ਅਨੁਸਾਰ ਕਾਰੋਬਾਰ ਦਾ ਤੁਰੰਤ ਪੁਨਰਗਠਨ ਕੀਤਾ ਜਾ ਰਿਹਾ ਹੈ।
ਰਿਸੀਵਰਾਂ ਨੇ ਕਿਹਾ ਕਿ ਬੰਦ ਕੀਤੇ ਜਾਣ ਵਾਲੇ 19 ਸਟੋਰਾਂ ਦੇ ਸਾਰੇ ਕਰਮਚਾਰੀਆਂ ਨਾਲ ਤੁਰੰਤ ਸਲਾਹ-ਮਸ਼ਵਰੇ ਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਗਈ ਹੈ। ਫਿਲਹਾਲ ਇਹ ਸਟੋਰ ਆਪਣਾ ਕਾਰੋਬਾਰ ਜਾਰੀ ਰੱਖਣਗੇ। ਹਾਲਾਂਕਿ ਸਟੋਰ ਬੰਦ ਕਰਨ ਦੀ ਅੰਤਿਮ ਤਰੀਕ ਤੈਅ ਨਹੀਂ ਕੀਤੀ ਗਈ, ਪਰ ਉਮੀਦ ਹੈ ਕਿ ਇਹ ਸਾਲ ਦੇ ਅੰਤ ਤੱਕ ਆਪਣਾ ਕਾਰੋਬਾਰ ਬੰਦ ਕਰ ਦੇਣਗੇ।
ਕੰਪਨੀ ਦੇ ਕਰਮਚਾਰੀਆਂ ਨੂੰ ਬੁੱਧਵਾਰ ਨੂੰ ਇਸ ਫੈਸਲੇ ਬਾਰੇ ਜਾਣਕਾਰੀ ਦੇ ਦਿੱਤੀ ਗਈ ਹੈ ਅਤੇ ਅਗਲੇ ਸੱਤ ਦਿਨਾਂ ਤੱਕ ਸਲਾਹ-ਮਸ਼ਵਰੇ ਦੀ ਪ੍ਰਕਿਰਿਆ ਜਾਰੀ ਰਹੇਗੀ।
ਆਕਲੈਂਡ ਦੇ ਨਿਊਮਾਰਕਿਟ ਵਿੱਚ ਸਥਿਤ ਇਹ ਸਟੋਰ 2019 ਵਿੱਚ ਖੋਲ੍ਹਿਆ ਗਿਆ ਸੀ। ਉਸ ਸਮੇਂ ਇਸ ਨੂੰ ਨਵੇਂ ਖੁੱਲ੍ਹੇ ਸ਼ਾਪਿੰਗ ਸੈਂਟਰ ਦੇ ਇੱਕ ਪ੍ਰਮੁੱਖ ਸਟੋਰ ਵਜੋਂ ਪੇਸ਼ ਕੀਤਾ ਗਿਆ ਸੀ। ਇਹ ਨਿਊਜ਼ੀਲੈਂਡ ਵਿੱਚ ਡੇਵਿਡ ਜੋਨਸ ਦਾ ਇਕਲੌਤਾ ਸਟੋਰ ਹੈ।
ਸਰੋਤ: 1News
