ਜਾਣੋ ਨਿਊਜ਼ੀਲੈਂਡ ਵਿੱਚ ਬਿਮਾਰੀ ਦੀ ਛੁੱਟੀ ਲਈ ਕਿਵੇਂ ਲਿਆ ਜਾ ਸਕਦਾ ਮੈਡੀਕਲ ਸਰਟੀਫਿਕੇਟ

ਆਕਲੈਂਡ (ਹਰਪ੍ਰੀਤ ਸਿੰਘ) – ਨਿਊਜ਼ੀਲੈਂਡ ਵਿੱਚ ਜੇ ਤੁਸੀਂ ਬੀਮਾਰ ਹੋ ਜਾਂ ਕਿਸੇ ਕਾਰਨ ਕਰਕੇ ਕੰਮ ਕਰਨ ਦੇ ਯੋਗ ਨਹੀਂ ਹੋ, ਤਾਂ ਤੁਹਾਨੂੰ ਬੀਮਾਰੀ ਦੀ ਛੁੱਟੀ ਲੈਣ ਦਾ ਪੂਰਾ ਹੱਕ ਹੈ। ਇਹ ਨਿਯਮ ਸਿਰਫ ਦਫ਼ਤਰ ਜਾਂ ਫੈਕਟਰੀ ਵਿੱਚ ਕੰਮ ਕਰਨ ਵਾਲਿਆਂ ਲਈ ਹੀ ਨਹੀਂ, ਸਗੋਂ ਹੋਮ ਆਫਿਸ ਤੋਂ ਕੰਮ ਕਰਨ ਵਾਲਿਆਂ ਲਈ ਵੀ ਲਾਗੂ ਹੁੰਦਾ ਹੈ। ਮਾਲਕ ਕਾਨੂੰਨੀ ਤੌਰ ‘ਤੇ ਤੁਹਾਡੇ ਕੋਲੋਂ ਮੈਡੀਕਲ ਸਰਟੀਫਿਕੇਟ ਦੀ ਮੰਗ ਕਰ ਸਕਦਾ ਹੈ, ਚਾਹੇ ਤੁਸੀਂ ਸਿਰਫ ਇੱਕ ਹੀ ਦਿਨ ਦੀ ਬਿਮਾਰੀ ਲਈ ਛੁੱਟੀ ਲੈਣੀ ਹੈ। ਅਕਸਰ ਡਾਕਟਰ ਕੋਲ ਟਾਈਮ ਮਿਲਣਾ ਥੋੜ੍ਹਾ ਮੁਸ਼ਕਲ ਹੋ ਜਾਂਦਾ ਹੈ, ਪਰ ਚਿੰਤਾ ਦੀ ਗੱਲ ਨਹੀਂ, ਕਿਉਂਕਿ ਹੋਰ ਵਿਕਲਪ ਵੀ ਉਪਲਬਧ ਹਨ।
ਤੁਸੀਂ ਆਪਣੇ ਨਜ਼ਦੀਕੀ ਜੀਪੀ (ਜਨਰਲ ਡਾਕਟਰ) ਕੋਲੋਂ ਸਰਟੀਫਿਕੇਟ ਲੈ ਸਕਦੇ ਹੋ, ਜਾਂ ਫੋਨ ਤੇ ਜਾਂ ਔਨਲਾਈਨ ਟੈਲੀਹੈਲਥ ਸੇਵਾਵਾਂ ਰਾਹੀਂ ਵੀ ਇਹ ਸਰਟੀਫਿਕੇਟ ਪ੍ਰਾਪਤ ਕੀਤਾ ਜਾ ਸਕਦਾ ਹੈ। ਕਈ ਫਾਰਮੇਸੀ ਕਲੀਨਿਕ ਵੀ ਮਿਆਰੀ ਜਾਂਚ ਤੋਂ ਬਾਅਦ ਮੈਡੀਕਲ ਸਰਟੀਫਿਕੇਟ ਜਾਰੀ ਕਰਦੇ ਹਨ। ਇਹ ਵੀ ਜਾਨਣਾ ਜਰੂਰੀ ਹੈ ਕਿ ਮਾਲਕ ਤੁਹਾਡੀ ਬੀਮਾਰੀ ਬਾਰੇ ਵਿਸਥਾਰ ਨਹੀਂ ਮੰਗ ਸਕਦਾ। ਉਹ ਸਿਰਫ ਇਹ ਜਾਣਨਾ ਚਾਹੁੰਦਾ ਹੈ ਕਿ ਤੁਸੀਂ ਕੰਮ ਕਰਨ ਦੇ ਯੋਗ ਨਹੀਂ ਹੋ। ਇਸ ਲਈ, ਜੇ ਤੁਸੀਂ ਬੀਮਾਰ ਮਹਿਸੂਸ ਕਰ ਰਹੇ ਹੋ, ਤਾਂ ਅਰਾਮ ਕਰੋ, ਜ਼ਰੂਰੀ ਦਸਤਾਵੇਜ਼ ਇਕੱਠੇ ਕਰੋ ਅਤੇ ਆਪਣੀ ਸਿਹਤ ਨੂੰ ਪਹਿਲ ਦੇਵੋ।