ਰੋਟੋਰੂਆ (ਹਰਪ੍ਰੀਤ ਸਿੰਘ) – ਰੋਟੋਰੂਆ ਵਿੱਚ ਇੱਕ ਟੈਕਸੀ ਡਰਾਈਵਰ ਨੂੰ ਉਸ ਸਮੇਂ ਬੰਦੂਕ ਦੀ ਨੋਕ ‘ਤੇ ਧਮਕਾ ਕੇ ਪੈਸੇ ਕਢਣ ਲਈ ਮਜਬੂਰ ਕੀਤਾ ਗਿਆ, ਜਦੋਂ ਉਸਨੇ ਇੱਕ ਯਾਤਰੀ ਨੂੰ ਸਵਾਰੀ ਲਈ ਚੁੱਕਿਆ। ਪੁਲਿਸ ਦੇ ਮੁਤਾਬਕ, ਡਰਾਈਵਰ ਨੇ ਕੱਲ੍ਹ ਸਵੇਰੇ ਸੈਲਵਿਨ ਹਾਈਟਸ ਇਲਾਕੇ ਤੋਂ ਇੱਕ ਆਦਮੀ ਨੂੰ ਲਿਫ਼ਟ ਦਿੱਤੀ। ਪਰ ਜਦੋਂ ਯਾਤਰੀ ਦੀ ਪੈਮੇਂਟ ਰੱਦ ਹੋ ਗਈ, ਉਸਨੇ ਇੱਕ ਪਿਸਤੌਲ ਕੱਢ ਲਈ।
ਡਿਟੈਕਟਿਵ ਸਰਜੰਟ ਜੋਨਾਥਨ ਬ੍ਰੇਡੀ ਨੇ ਦੱਸਿਆ ਕਿ ਡਰਾਈਵਰ ਨੂੰ ਬੰਦੂਕ ਦੀ ਨੋਕ ‘ਤੇ ATM ਤੱਕ ਲੈ ਜਾ ਕੇ ਆਪਣੇ ਪੈਸੇ ਕਢਣ ਲਈ ਮਜਬੂਰ ਕੀਤਾ ਗਿਆ। ਉਸ ਆਦਮੀ ਨੇ ਕਢੇ ਹੋਏ ਪੈਸੇ ਅਤੇ ਟੈਕਸੀ ਵਿੱਚ ਮੌਜੂਦ ਨਕਦ ਰਕਮ ਦੋਵੇਂ ਲੈ ਲਈ।
ਬ੍ਰੇਡੀ ਨੇ ਕਿਹਾ, “ਖੁਸ਼ਕਿਸਮਤੀ ਨਾਲ ਟੈਕਸੀ ਡਰਾਈਵਰ ਨੂੰ ਕੋਈ ਚੋਟ ਨਹੀਂ ਲੱਗੀ, ਪਰ ਉਹ ਇਸ ਘਟਨਾ ਤੋਂ ਸਪਸ਼ਟ ਤੌਰ ‘ਤੇ ਹਿਲ ਗਿਆ ਹੈ।”
ਪੁਲਿਸ ਅਨੁਸਾਰ, ਅੱਜ ਤੜਕੇ 1 ਵਜੇ ਦੇ ਕਰੀਬ, ਸ਼ੱਕੀ ਆਦਮੀ ਨੂੰ ਇੱਕ ਰੋਟੋਰੂਆ ਬਾਰ ਵਿੱਚ ਵੇਖਿਆ ਗਿਆ, ਜਿੱਥੋਂ ਉਹ ਇੱਕ ਹੋਰ ਟੈਕਸੀ ਵਿੱਚ ਫਰਾਰ ਹੋ ਗਿਆ। ਬਾਅਦ ਵਿੱਚ, ਜਦੋਂ ਪੁਲਿਸ ਨੇ ਟੈਕਸੀ ਨੂੰ ਰੋਕਿਆ, ਤਾਂ ਇੱਕ ਏਅਰਗਨ ਮਿਲੀ ਅਤੇ ਉਸ ਆਦਮੀ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ। 26 ਸਾਲਾ ਆਰੋਪੀ ਨੂੰ ਰੋਟੋਰੂਆ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ, ਜਿੱਥੇ ਉਸ ‘ਤੇ ਹਥਿਆਰਬੰਦ ਡਾਕੇ ਅਤੇ ਗੈਰਕਾਨੂੰਨੀ ਹਥਿਆਰ ਰੱਖਣ ਦੇ ਦੋਸ਼ ਲਗੇ ਹਨ।
