ਆਕਲੈਂਡ (ਹਰਪ੍ਰੀਤ ਸਿੰਘ ) 
ਲੋਕਲ ਗਵਰਨਮੈਂਟ ਨਿਊਜ਼ੀਲੈਂਡ (LGNZ) ਦੇ ਅਨੁਸਾਰ ਇਸ ਸਾਲ ਦੀਆਂ ਸਥਾਨਕ ਸਰਕਾਰੀ ਚੋਣਾਂ ਵਿੱਚ 10 ਲੱਖ ਤੋਂ ਵੱਧ ਵੋਟਾਂ ਦੀ ਗਿਣਤੀ ਹੋ ਚੁੱਕੀ ਹੈ, ਜਿਸ ਨਾਲ ਵੋਟਰ ਟਰਨਆਉਟ 31.61 ਫੀਸਦੀ ਦਰਜ ਕੀਤਾ ਗਿਆ ਹੈ।ਹਾਲਾਂਕਿ LGNZ ਨੇ ਦੱਸਿਆ ਹੈ ਕਿ ਇਹ ਅੰਕੜੇ ਅਜੇ ਪੂਰੇ ਨਹੀਂ ਹਨ ਕਿਉਂਕਿ ਚਾਰ ਕੌਂਸਲਾਂ ਦੇ ਨਤੀਜੇ ਅਤੇ ਕੁਝ ਰੀਜਨਲ ਕੌਂਸਲਾਂ ਦੀਆਂ ਵੋਟਾਂ ਦੀ ਗਿਣਤੀ ਬਾਕੀ ਹੈ। ਜਦੋਂ ਇਹ ਸ਼ਾਮਲ ਕੀਤੀਆਂ ਜਾਣਗੀਆਂ, ਉਸ ਸਮੇਂ ਅੰਤਿਮ ਵੋਟਿੰਗ ਦਰ ਵਿੱਚ ਕੁਝ ਵਾਧਾ ਹੋਣ ਦੀ ਉਮੀਦ ਹੈ। ਇਹ ਅੰਕੜੇ ਹਾਲੇ ਹੁਣ ਤੱਕ ਆਏ ਨਤੀਜਿਆਂ ‘ਤੇ ਅਧਾਰਿਤ ਹਨ, ਜਿੱਥੇ ਬਾਕੀ ਰਹਿ ਗਈਆਂ ਵੋਟਾਂ ਦੀ ਗਿਣਤੀ ਨਾਲ ਕੁੱਲ ਹਿੱਸੇਦਾਰੀ ਕੁਝ ਹੋਰ ਵਧ ਸਕਦੀ ਹੈ।—
ਰਾਸ਼ਟਰੀ ਚੋਣਾਂ ਨਾਲ ਤੁਲਨਾ
ਵੋਟਿੰਗ ਦਰ ਦੇ ਮਾਮਲੇ ਵਿੱਚ ਸਥਾਨਕ ਚੋਣਾਂ ਹਮੇਸ਼ਾ ਰਾਸ਼ਟਰੀ ਚੋਣਾਂ ਨਾਲੋਂ ਕਾਫੀ ਪਿੱਛੇ ਰਹਿੰਦੀਆਂ ਹਨ।
2023 ਦੀ ਨਿਊਜ਼ੀਲੈਂਡ ਜਨਰਲ ਚੋਣ ਵਿੱਚ ਵੋਟਿੰਗ ਦਰ ਲਗਭਗ 78 ਫੀਸਦੀ ਰਹੀ ਸੀ, ਜੋ ਸਥਾਨਕ ਪੱਧਰ ਦੀਆਂ ਚੋਣਾਂ ਨਾਲੋਂ ਦੁੱਗੀ ਤੋਂ ਵੀ ਵੱਧ ਹੈ।
ਰਾਜਨੀਤਿਕ ਮਾਹਰਾਂ ਦਾ ਮੰਨਣਾ ਹੈ ਕਿ ਲੋਕ ਸਥਾਨਕ ਚੋਣਾਂ ਵਿੱਚ ਘੱਟ ਦਿਲਚਸਪੀ ਦਿਖਾਉਂਦੇ ਹਨ ਕਿਉਂਕਿ ਉਹਨਾਂ ਨੂੰ ਉਮੀਦਵਾਰਾਂ ਬਾਰੇ ਘੱਟ ਜਾਣਕਾਰੀ ਹੁੰਦੀ ਹੈ ਜਾਂ ਉਹ ਸਮਝਦੇ ਹਨ ਕਿ ਸਥਾਨਕ ਸਰਕਾਰਾਂ ਦਾ ਉਨ੍ਹਾਂ ਦੀ ਰੋਜ਼ਾਨਾ ਜ਼ਿੰਦਗੀ ‘ਤੇ ਘੱਟ ਅਸਰ ਹੁੰਦਾ ਹੈ। LGNZ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਹ ਘੱਟ ਹਿੱਸੇਦਾਰੀ ਚਿੰਤਾਜਨਕ ਹੈ ਅਤੇ ਆਉਣ ਵਾਲੇ ਸਾਲਾਂ ਵਿੱਚ ਜਾਗਰੂਕਤਾ ਮੁਹਿੰਮਾਂ ਰਾਹੀਂ ਲੋਕਾਂ ਨੂੰ ਵੋਟਿੰਗ ਵੱਲ ਪ੍ਰੇਰਿਤ ਕਰਨ ਦੀ ਲੋੜ ਹੋਵੇਗੀ।
LGNZ ਦੇ ਬੁਲਾਰੇ ਨੇ ਕਿਹਾ ਕਿ “ਸਾਡੇ ਲੋਕ ਰਾਸ਼ਟਰੀ ਚੋਣਾਂ ਵਿੱਚ ਤਾਂ ਵੋਟ ਪਾਉਂਦੇ ਹਨ ਪਰ ਸਥਾਨਕ ਚੋਣਾਂ ਨੂੰ ਉਨ੍ਹਾਂ ਦੀ ਮਹੱਤਤਾ ਅਜੇ ਵੀ ਸਮਝ ਨਹੀਂ ਆਈ,” ।“ਪਰ ਸੱਚ ਇਹ ਹੈ ਕਿ ਸਥਾਨਕ ਕੌਂਸਲ ਹੀ ਸੜਕਾਂ, ਪਾਣੀ, ਆਵਾਜਾਈ ਅਤੇ ਕਮਿਊਨਿਟੀ ਸੇਵਾਵਾਂ ‘ਤੇ ਸਭ ਤੋਂ ਵੱਧ ਅਸਰ ਰੱਖਦੀਆਂ ਹਨ।”
