ਮੈਲਬਰਨ (ਆਸਟ੍ਰੇਲੀਅਨ ਪੰਜਾਬੀ ਨਿਊਜ਼) – ਆਸਟ੍ਰੇਲੀਆ ਦੇ ਮੈਲਬਰਨ ਵਿੱਚ ਸ਼ਰਾਬ ਪੀਣ ਤੋਂ ਬਾਅਦ ਹੋਏ ਝਗੜੇ ਦੌਰਾਨ ਇੱਕ ਅੰਤਰਰਾਸ਼ਟਰੀ ਵਿਦਿਆਰਥੀ ਦਾ ਚਾਕੂ ਮਾਰ ਕੇ ਕਤਲ ਕਰਨ ਅਤੇ ਦੂਜੇ ਨੌਜਵਾਨ ਨੂੰ ਮਾਰਨ ਦੀ ਕੋਸ਼ਿਸ਼ ਕਰਨ ਦੇ ਦੋਸ਼ ਹੇਠ ਭਾਰਤੀ ਮੂਲ ਦੇ 30 ਸਾਲਾ ਵਿਅਕਤੀ ਨੂੰ 27 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ।
ਵਿਕਟੋਰੀਆ ਦੀ ਸੁਪਰੀਮ ਕੋਰਟ ਨੇ ਰੌਬਿਨ ਰੌਬਿਨ ਨੂੰ 22 ਸਾਲਾ ਨਵਜੀਤ ਸਿੰਘ ਸੰਧੂ ਦੇ ਕਤਲ ਅਤੇ 30 ਸਾਲਾ ਸ਼ਰਵਣ ਸਿੰਘ ਦੇ ਕਤਲ ਦੀ ਕੋਸ਼ਿਸ਼ ਲਈ ਦੋਸ਼ੀ ਠਹਿਰਾਇਆ। ਅਦਾਲਤ ਨੇ ਉਸ ਲਈ 20 ਸਾਲ ਦਾ non-parole period ਤੈਅ ਕੀਤਾ ਹੈ। ਇਸਦਾ ਮਤਲਬ ਹੈ ਕਿ ਉਸਨੂੰ ਪੈਰੋਲ ਲਈ ਯੋਗ ਹੋਣ ਤੋਂ ਪਹਿਲਾਂ ਘੱਟੋ-ਘੱਟ 20 ਸਾਲ ਜੇਲ੍ਹ ਵਿੱਚ ਬਿਤਾਉਣੇ ਪੈਣਗੇ।
ਅਦਾਲਤ ਵਿੱਚ ਦੱਸਿਆ ਗਿਆ ਕਿ ਮਈ 2024 ਵਿੱਚ ਰੌਬਿਨ ਆਪਣੇ ਭਰਾ ਅਭਿਜੀਤ ਵੱਲੋਂ ਕਾਰ ਖ਼ਰੀਦਣ ਦੀ ਖ਼ੁਸ਼ੀ ਵਿੱਚ ਦੋਸਤਾਂ ਨਾਲ ਆਪਣੇ ਘਰ ਵਿਸਕੀ ਪੀ ਰਿਹਾ ਸੀ। ਇਸ ਦੌਰਾਨ ਸ਼ਰਵਣ ਸਿੰਘ ਬਿਨਾਂ ਅਲਵਿਦਾ ਕਹੇ ਉੱਥੋਂ ਚਲਾ ਗਿਆ ਅਤੇ ਨਵਜੀਤ ਸਿੰਘ ਸੰਧੂ ਦੇ ਘਰ ਜਾ ਕੇ ਤਾਸ਼ ਖੇਡਣ ਲੱਗ ਪਿਆ।
ਇਸ ਗੱਲ ਤੋਂ ਗੁੱਸੇ ਵਿੱਚ ਆਏ ਰੌਬਿਨ ਨੇ ਸ਼ਰਵਣ ਨੂੰ ਵਾਰ-ਵਾਰ ਫੋਨ ਕੀਤੇ, ਕਥਿਤ ਤੌਰ ’ਤੇ ਗਾਲਾਂ ਕੱਢੀਆਂ ਅਤੇ ਉਸਨੂੰ ਵਾਪਸ ਆਉਣ ਲਈ ਕਿਹਾ। ਜਦੋਂ ਸ਼ਰਵਣ ਆਪਣਾ ਸਾਮਾਨ ਲੈਣ ਲਈ ਨਵਜੀਤ ਨਾਲ ਵਾਪਸ ਆਇਆ ਤਾਂ ਰੌਬਿਨ ਨੇ ਉਸ ਉੱਤੇ ਚਾਕੂ ਨਾਲ ਹਮਲਾ ਕਰਦਿਆਂ ਉਸਦੀ ਛਾਤੀ ਵਿੱਚ ਵਾਰ ਕਰ ਦਿੱਤਾ।
ਸ਼ਰਵਣ ਨੂੰ ਬਚਾਉਣ ਲਈ ਨਵਜੀਤ ਵਿਚਕਾਰ ਆਇਆ ਤਾਂ ਰੌਬਿਨ ਨੇ ਉਸਨੂੰ ਵੀ ਨਿਸ਼ਾਨਾ ਬਣਾ ਲਿਆ। ਅਦਾਲਤ ਮੁਤਾਬਕ ਰੌਬਿਨ ਨੇ ਨਵਜੀਤ ਨੂੰ ਕਾਲਰ ਤੋਂ ਫੜਿਆ ਅਤੇ ਉਸ ਵੱਲੋਂ ਬਚ ਕੇ ਨਿਕਲਣ ਦੀ ਕੋਸ਼ਿਸ਼ ਕਰਨ ਦੇ ਬਾਵਜੂਦ ਉਸ ਉੱਤੇ ਚਾਕੂ ਨਾਲ ਕਈ ਵਾਰ ਕੀਤੇ।
ਹਮਲੇ ਕਾਰਨ ਨਵਜੀਤ ਦੇ ਦਿਲ ਅਤੇ ਫੇਫੜਿਆਂ ਨੂੰ ਗੰਭੀਰ ਸੱਟਾਂ ਲੱਗੀਆਂ ਅਤੇ ਉਸਦੀ ਮੌਤ ਹੋ ਗਈ। ਸ਼ਰਵਣ ਗੰਭੀਰ ਜ਼ਖ਼ਮੀ ਹੋਣ ਦੇ ਬਾਵਜੂਦ ਬਚ ਗਿਆ।
ਮੁਕੱਦਮੇ ਦੌਰਾਨ ਰੌਬਿਨ ਨੇ ਦਾਅਵਾ ਕੀਤਾ ਕਿ ਉਸਨੇ ਆਪਣੇ ਬਚਾਅ ਲਈ ਕਾਰਵਾਈ ਕੀਤੀ ਸੀ, ਪਰ ਜਿਊਰੀ ਨੇ ਉਸਦੀ self-defence ਵਾਲੀ ਦਲੀਲ ਨੂੰ ਰੱਦ ਕਰਦਿਆਂ ਉਸਨੂੰ ਕਤਲ ਅਤੇ ਕਤਲ ਦੀ ਕੋਸ਼ਿਸ਼ ਦਾ ਦੋਸ਼ੀ ਕਰਾਰ ਦਿੱਤਾ।
ਸਜ਼ਾ ਸੁਣਾਉਂਦਿਆਂ ਜਸਟਿਸ ਐਂਡਰਿਊ ਟਿੰਨੀ ਨੇ ਹਮਲੇ ਨੂੰ ਬਿਨਾਂ ਕਿਸੇ ਉਕਸਾਵੇ ਅਤੇ ਬਿਨਾਂ ਕਿਸੇ ਵਾਜਬ ਕਾਰਨ ਕੀਤੀ ਗਈ ਹਿੰਸਾ ਦੱਸਿਆ। ਜੱਜ ਨੇ ਕਿਹਾ ਕਿ ਰੌਬਿਨ ਨੇ “ਕਾਤਲਾਨਾ ਗੁੱਸੇ” ਵਿੱਚ ਕਾਰਵਾਈ ਕੀਤੀ ਅਤੇ ਉਸਦੀ ਹਿੰਸਾ ਬੇਹੱਦ ਗੰਭੀਰ ਸੀ।
ਅਦਾਲਤ ਨੇ ਇਹ ਵੀ ਕਿਹਾ ਕਿ ਦੋਸ਼ੀ ਨੇ ਆਪਣੇ ਕੀਤੇ ਲਈ ਸੱਚਾ ਪਛਤਾਵਾ ਨਹੀਂ ਦਿਖਾਇਆ। ਜੱਜ ਮੁਤਾਬਕ ਰੌਬਿਨ ਵਿੱਚ ਆਪਣੇ ਅਪਰਾਧ ਲਈ ਅਫ਼ਸੋਸ ਅਤੇ ਪਛਤਾਵੇ ਦੀ ਘਾਟ ਸਜ਼ਾ ਸੁਣਾਏ ਜਾਣ ਤੱਕ ਵੀ ਜਾਰੀ ਰਹੀ।
ਹਮਲੇ ਤੋਂ ਬਾਅਦ ਰੌਬਿਨ ਆਪਣੇ ਭਰਾ ਨਾਲ ਵਿਕਟੋਰੀਆ ਤੋਂ ਭੱਜ ਗਿਆ ਸੀ। ਪੁਲਿਸ ਨੇ ਉਸਨੂੰ ਦੋ ਦਿਨ ਬਾਅਦ ਨਿਊ ਸਾਊਥ ਵੇਲਜ਼ ਤੋਂ ਗ੍ਰਿਫ਼ਤਾਰ ਕਰ ਲਿਆ ਸੀ।
ਨਵਜੀਤ ਦੇ ਪਿਤਾ ਜਤਿੰਦਰ ਸੰਧੂ ਨੇ ਵੀਡੀਓ ਲਿੰਕ ਰਾਹੀਂ ਸਜ਼ਾ ਦੀ ਕਾਰਵਾਈ ਦੇਖੀ। ਉਨ੍ਹਾਂ ਨੇ ਕਿਹਾ ਕਿ ਪੁੱਤਰ ਦੀ ਮੌਤ ਨੇ ਪਰਿਵਾਰ ਦੀਆਂ ਸਾਰੀਆਂ ਉਮੀਦਾਂ ਅਤੇ ਸੁਪਨੇ ਤਬਾਹ ਕਰ ਦਿੱਤੇ ਹਨ।
ਰੌਬਿਨ ਗ੍ਰਿਫ਼ਤਾਰੀ ਤੋਂ ਬਾਅਦ ਦੋ ਸਾਲ ਤੋਂ ਵੱਧ ਸਮਾਂ ਹਿਰਾਸਤ ਵਿੱਚ ਬਿਤਾ ਚੁੱਕਾ ਹੈ। ਉਸਦੀ ਸਜ਼ਾ ਪੂਰੀ ਹੋਣ ਤੋਂ ਬਾਅਦ ਉਸਨੂੰ ਆਸਟ੍ਰੇਲੀਆ ਤੋਂ ਭਾਰਤ ਡਿਪੋਰਟ ਕੀਤੇ ਜਾਣ ਦੀ ਸੰਭਾਵਨਾ ਹੈ। [Times of India]
