ਆਕਲੈਂਡ (NZ Punjabi News): ਆਕਲੈਂਡ ਵਿੱਚ ਪਾਰਕਿੰਗ ਦੀਆਂ ਚਾਰ $85 ਦੀਆਂ ਟਿਕਟਾਂ ਨੂੰ ਚੁਣੌਤੀ ਦੇਣ ਵਾਲਾ ਮਾਮਲਾ ਹੁਣ ਗੋਪਨੀਯਤਾ ਅਤੇ ਨਿਗਰਾਨੀ ਨੂੰ ਲੈ ਕੇ ਵੱਡੀ ਚਰਚਾ ਦਾ ਵਿਸ਼ਾ ਬਣ ਗਿਆ ਹੈ। ਆਕਲੈਂਡ ਦੇ ਟੈਕਨਾਲੋਜੀ ਖੇਤਰ ਨਾਲ ਜੁੜੇ ਪਾਲ ਰਾਇਨ ਨੂੰ ਪਾਰਨੇਲ ਇਲਾਕੇ ਵਿੱਚ ਪਾਰਕਿੰਗ ਫੀਸ ਨਾ ਭਰਨ ਦੇ ਦੋਸ਼ ਹੇਠ ਆਕਲੈਂਡ ਟਰਾਂਸਪੋਰਟ (AT) ਵੱਲੋਂ ਕਈ $85 ਦੀਆਂ ਪਾਰਕਿੰਗ ਟਿਕਟਾਂ ਜਾਰੀ ਕੀਤੀਆਂ ਗਈਆਂ ਸਨ।
ਰਾਇਨ ਨੇ ਇਨ੍ਹਾਂ ਨੋਟਿਸਾਂ ਨੂੰ ਅਦਾਲਤ ਵਿੱਚ ਚੁਣੌਤੀ ਦਿੱਤੀ ਅਤੇ ਸਬੂਤ ਵਜੋਂ ਵਰਤੀ ਗਈ ਅਸਲ ਕੈਮਰਾ ਫੁਟੇਜ ਦੀ ਮੰਗ ਕੀਤੀ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਸਿਰਫ਼ ਆਪਣੀ ਗੱਡੀ ਨਾਲ ਸਬੰਧਤ ਫੁਟੇਜ ਦੀ ਬਜਾਏ AT ਦੇ ਨੰਬਰ ਪਲੇਟ ਪਛਾਣਨ ਵਾਲੇ ਕੈਮਰਾ ਵਾਹਨਾਂ ਦੀਆਂ ਕਈ ਘੰਟਿਆਂ ਦੀਆਂ ਰਿਕਾਰਡਿੰਗਾਂ ਦਿੱਤੀਆਂ ਗਈਆਂ।
ਰਾਇਨ ਮੁਤਾਬਕ, ਫੁਟੇਜ ਵਿੱਚ ਸੜਕਾਂ, ਪੈਦਲ ਚੱਲਣ ਵਾਲੇ ਲੋਕ, ਨਿੱਜੀ ਜਾਇਦਾਦਾਂ ਅਤੇ ਕਾਰੋਬਾਰ ਵੀ ਰਿਕਾਰਡ ਹੋ ਰਹੇ ਸਨ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਸਵਾਲ ਉਠਾਇਆ ਕਿ ਕੀ ਇਹ ਪ੍ਰਣਾਲੀ ਆਮ ਲੋਕਾਂ ਦੀ ਬੇਲੋੜੀ ਨਿਗਰਾਨੀ ਦਾ ਰੂਪ ਤਾਂ ਨਹੀਂ ਹੈ। ਉਨ੍ਹਾਂ ਕਿਹਾ, “ਜੇ ਸਾਡੀ ਨਿਗਰਾਨੀ ਕੀਤੀ ਜਾ ਰਹੀ ਹੈ ਤਾਂ ਇਸ ਲਈ ਸਾਡੀ ਸਹਿਮਤੀ ਹੋਣੀ ਚਾਹੀਦੀ ਹੈ।”
ਆਕਲੈਂਡ ਟਰਾਂਸਪੋਰਟ ਸ਼ਹਿਰ ਭਰ ਵਿੱਚ ਮੋਬਾਈਲ ਕੈਮਰਾ ਵਾਹਨਾਂ ਰਾਹੀਂ ਆਟੋਮੈਟਿਕ ਨੰਬਰ ਪਲੇਟ ਰਿਕਗਨੀਸ਼ਨ ਤਕਨਾਲੋਜੀ ਦੀ ਵਰਤੋਂ ਕਰਦਾ ਹੈ, ਜਿਸ ਦਾ ਮਕਸਦ ਪਾਰਕਿੰਗ ਨਿਯਮਾਂ ਦੀ ਉਲੰਘਣਾ ਦੀ ਪਛਾਣ ਕਰਨਾ ਹੈ। AT ਦਾ ਕਹਿਣਾ ਹੈ ਕਿ ਕੈਮਰਿਆਂ ਦੀ ਵਰਤੋਂ ਸਿਰਫ਼ ਪਾਰਕਿੰਗ ਉਲੰਘਣਾਵਾਂ ਦੇ ਸਬੂਤ ਇਕੱਠੇ ਕਰਨ ਲਈ ਕੀਤੀ ਜਾਂਦੀ ਹੈ ਅਤੇ ਜੋ ਫੁਟੇਜ ਕਾਰਵਾਈ ਲਈ ਲੋੜੀਂਦੀ ਨਹੀਂ ਹੁੰਦੀ, ਉਸ ਨੂੰ ਬਾਅਦ ਵਿੱਚ ਮਿਟਾ ਦਿੱਤਾ ਜਾਂਦਾ ਹੈ। ਏਜੰਸੀ ਨੇ ਕਿਹਾ ਕਿ ਇਹ ਪ੍ਰਣਾਲੀ ਕਾਨੂੰਨੀ ਨਿਯਮਾਂ ਅਨੁਸਾਰ ਚੱਲਦੀ ਹੈ।
ਹਾਲਾਂਕਿ ਰਾਇਨ ਉਮੀਦ ਕਰ ਰਹੇ ਸਨ ਕਿ ਅਦਾਲਤ ਵਿੱਚ ਸੁਣਵਾਈ ਦੌਰਾਨ ਕੈਮਰਾ ਪ੍ਰਣਾਲੀ ਰਾਹੀਂ ਸਬੂਤ ਇਕੱਠੇ ਕਰਨ ਦੀ ਕਾਨੂੰਨੀਤਾ ਦੀ ਜਾਂਚ ਹੋਵੇਗੀ, ਪਰ ਸੁਣਵਾਈ ਵਾਲੇ ਦਿਨ ਹੀ ਆਕਲੈਂਡ ਟਰਾਂਸਪੋਰਟ ਨੇ ਸਾਰੀਆਂ ਚਾਰ ਇਨਫ੍ਰਿੰਜਮੈਂਟ ਨੋਟਿਸ ਵਾਪਸ ਲੈ ਲਈਆਂ। ਰਾਇਨ ਹੁਣ ਆਪਣੇ ਕੇਸ ਦੀ ਤਿਆਰੀ ‘ਤੇ ਹੋਏ ਖਰਚੇ ਦੀ ਵਸੂਲੀ ਦੀ ਮੰਗ ਕਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਇਸ ਮਾਮਲੇ ਦਾ ਸਭ ਤੋਂ ਵੱਡਾ ਮੁੱਦਾ ਲੋਕਾਂ ਨੂੰ ਇਹ ਜਾਣਕਾਰੀ ਹੋਣਾ ਹੈ ਕਿ ਅਜਿਹੀ ਕੈਮਰਾ ਤਕਨਾਲੋਜੀ ਕਿਵੇਂ ਕੰਮ ਕਰਦੀ ਹੈ ਅਤੇ ਕਿੰਨੀ ਜਾਣਕਾਰੀ ਇਕੱਠੀ ਕਰਦੀ ਹੈ।
ਗੋਪਨੀਯਤਾ ਮਾਹਿਰਾਂ ਦਾ ਕਹਿਣਾ ਹੈ ਕਿ ਆਟੋਮੈਟਿਕ ਕੈਮਰਾ ਪ੍ਰਣਾਲੀਆਂ ਨਿਯਮਾਂ ਨੂੰ ਲਾਗੂ ਕਰਨ ਵਿੱਚ ਮਦਦਗਾਰ ਹੋ ਸਕਦੀਆਂ ਹਨ, ਪਰ ਕਿਉਂਕਿ ਇਹ ਨਿੱਜੀ ਜਾਣਕਾਰੀ ਇਕੱਠੀ ਕਰਦੀਆਂ ਹਨ, ਇਸ ਲਈ ਇਨ੍ਹਾਂ ‘ਤੇ ਸਖ਼ਤ ਸੁਰੱਖਿਆ ਪ੍ਰਬੰਧ ਹੋਣੇ ਜ਼ਰੂਰੀ ਹਨ।
