ਮੈਲਬੋਰਨ (ਹਰਪ੍ਰੀਤ ਸਿੰਘ) - ਮੈਲਬੋਰਨ ਦੀ ਰਹਿਣ ਵਾਲੀ 19 ਸਾਲਾ ਕੇਸੀ ਅੱਜ ਵੀ ਆਪਣੇ ਨਾਲ ਵਾਪਰੀ ਉਸ ਘਟਨਾ ਨੂੰ ਨਹੀਂ ਭੁਲਾ ਪਾ ਰਹੀ, ਜਦੋਂ ਇੱਕ ਕਾਰ ਚੋਰ ਨੇ ਉਸਨੂੰ ਵੀ ਕਾਰ ਸਮੇਤ ਚੋਰੀ ਕਰ ਲਿਆ। ਦਰਅਸਲ ਉਹ ਮੈਲਬੋਰਨ ਦੇ ਬਰੇਬਰੁੱਕ ਦੀ ਚਿਉਟਨ ਸਟਰੀਟ 'ਤੇ ਆਪਣੇ ਅੰਕਲ ਦੀ ਕਾਰ ਵਿੱਚ ਬੈਠੀ ਅੰਕਲ ਦੀ ਉਡੀਕ ਕਰ ਰਹੀ ਸੀ ਤੇ ਜਦੋਂ ਇੱਕ ਵਿਅਕਤੀ ਅਚਾਨਕ ਕਾਰ ਵਿੱਚ ਆ ਬੈਠਾ ਤੇ ਮੌਕੇ ਤੋਂ ਕਾਰ ਭਜਾਕੇ ਲੈ ਗਿਆ।
ਕੇਸੀ ਅਨੁਸਾਰ ਇਹ ਘਟਨਾ ਬਹੁਤ ਡਰਾ ਦੇਣ ਵਾਲੀ ਸੀ, ਕਿਉਂਕ ਕਾਰ ਚੋਰ 100 ਦੀ ਰਫਤਾਰ 'ਤੇ ਬੇਲਗਾਮ ਹੋਕੇ ਗੱਡੀ ਚਲਾ ਰਿਹਾ ਸੀ। ਇੱਕ ਵਾਰ ਤਾਂ ਕੇਸੀ ਨੂੰ ਇਹ ਲੱਗਾ ਕਿ ਉਹ ਕਿਡਨੈਪ ਹੋ ਗਈ ਹੈ। ਕੁਝ ਸਮੇਂ ਬਾਅਦ ਕੇਸੀ ਨੇ ਕਾਰ ਚੋਰ ਨੂੰ ਗੱਡੀ ਹੌਲੀ ਕਰਨ ਦੀ ਗੱਲ ਕਹੀ ਤੇ ਅਜਿਹਾ ਨਾ ਕੀਤੇ ਜਾਣ 'ਤੇ ਕਾਰ ਤੋਂ ਛਾਲ ਮਾਰਨ ਦੀ ਧਮਕੀ ਦਿੱਤੀ। ਜਿਸ ਤੋਂ ਬਾਅਦ ਕਾਰ ਚੋਰ ਨੇ ਕਾਰ ਹੌਲੀ ਕੀਤੀ ਅਤੇ ਕੇਸੀ ਕਾਰ ਤੋਂ ਉੱਤਰ ਗਈ।
ਕੇਸੀ ਅਜੇ ਵੀ ਇਸ ਘਟਨਾ ਨੂੰ ਨਹੀਂ ਭੁਲਾ ਪਾ ਰਹੀ ਤੇ ਦੂਜੇ ਪਾਸੇ ਪੁਲਿਸ ਨੇ ਕਾਰ ਤਾਂ ਬਰਾਮਦ ਕਰ ਲਈ ਹੈ, ਪਰ ਕਾਰ ਚੋਰ ਦੀ ਭਾਲ ਅਜੇ ਵੀ ਜਾਰੀ ਹੈ।