ਆਕਲੈਂਡ (ਹਰਪ੍ਰੀਤ ਸਿੰਘ) - ਆਕਲੈਂਡ ਦੇ ਥਰੀ ਕਿੰਗਸ ਵਿਖੇ ਅੱਜ ਇੱਕ ਡੇਅਰੀ ਸ਼ਾਪ 'ਤੇ ਲੁੱਟ ਕਰਨ ਆਏ 5 ਜਣਿਆਂ ਦੇ ਗਰੁੱਪ ਨੂੰ ਉਸ ਵੇਲੇ ਉਲਟਾ ਹੀ ਭਾਜੜਾਂ ਪੈ ਗਈਆਂ, ਜਦੋਂ ਉਹ ਸਟੋਰ ਵਿੱਚ ਲੁੱਟ ਨੂੰ ਅੰਜਾਮ ਦੇ ਰਹੇ ਸੀ ਤੇ ਗੁਆਂਢ ਵਿੱਚ ਕੰਮ ਕਰਦੇ ਕਰਮਚਾਰੀਆਂ ਨੇ ਉਨ੍ਹਾਂ ਨੂੰ ਸਕਿਓਰਟੀ ਗੇਟ ਲਾਕੇ ਅੰਦਰ ਹੀ ਤਾੜ ਦਿੱਤਾ ਤੇ ਪੁਲਿਸ ਨੇ ਆਕੇ ਪੰਜਾਂ ਨੂੰ ਮੌਕੇ ਤੋਂ ਗ੍ਰਿਫਤਾਰ ਕੀਤਾ।
ਦਰਅਸਲ ਇਹ ਘਟਨਾ ਮਾਉਂਟ ਈਡਨ ਰੋਡ ਦੇ ਕੋਰਨਰ ਸਥਿਤ ਡਿਊਕ ਸਟਰੀਟ ਸੁਪਰੇਟ 'ਤੇ ਵਾਪਰੀ, ਜਿੱਥੇ 14 ਤੋਂ 17 ਸਾਲ ਦੇ 2 ਮੁੰਡੇ ਤੇ 3 ਕੁੜੀਆਂ ਸਟੋਰ ਲੁੱਟਣ ਲਈ ਆ ਪੁੱਜੇ, ਸਟੋਰ ਦੇ ਕਰਮਚਾਰੀ ਕਿਸੇ ਤਰੀਕੇ ਮੌਕੇ ਤੋਂ ਸੁਰੱਖਿਅਤ ਪਾਸੇ ਹੋਣ ਵਿੱਚ ਸਫਲ ਰਹੇ ਤੇ ਉਨ੍ਹਾਂ ਦੀਆਂ ਅਵਾਜਾਂ ਸੁਣ ਨਾਲ ਕੰਮ ਕਰਦੇ ਕਰਮਚਾਰੀ ਮੌਕੇ 'ਤੇ ਆ ਪੁੱਜੇ ਤੇ ਉਨ੍ਹਾਂ ਨੇ ਬਾਹਰਲਾ ਸਕਿਓਰਟੀ ਗੇਟ ਲਾ ਦਿੱਤਾ ਤੇ ਪੁਲਿਸ ਨੂੰ ਬੁਲਾ ਲਿਆ। ਪੁਲਿਸ ਨੇ ਮੌਕੇ 'ਤੇ ਪੁੱਜ ਸਾਰਿਆਂ ਨੂੰ ਗ੍ਰਿਫਤਾਰ ਕੀਤਾ ਤੇ ਉਨ੍ਹਾਂ ਦੀ ਚੋਰੀ ਦੀ ਗੱਡੀ ਨੂੰ ਜਬਤ ਕੀਤਾ।