ਆਕਲੈਂਡ (ਹਰਪ੍ਰੀਤ ਸਿੰਘ) - ਨਿਊਜੀਲੈਂਡ ਪੁਲਿਸ ਤੇ ਕਸਟਮ ਵਿਭਾਗ ਨੇ ਸਟੀਲ ਦੇ 42 ਗਾਰਡਰਾਂ ਵਿੱਚ ਲੁਕੋ ਕੇ ਭੇਜੀ ਮੈੱਥ (ਕਲਾਸ ਏ ਡਰਗ) ਫੜਣ ਵਿੱਚ ਵੱਡੀ ਸਫਲਤਾ ਹਾਸਿਲ ਕੀਤੀ ਹੈ। ਇਸ ਡਰਗਸ ਨੂੰ ਵਾਇਕਾਟੋ ਦੇ ਇੱਕ ਪਤੇ 'ਤੇ ਭੇਜਿਆ ਜਾਣਾ ਸੀ, ਜਿੱਥੋਂ ਪੁਲਿਸ ਨੇ ਕਈ ਗ੍ਰਿਫਤਾਰੀਆਂ ਕੀਤੀਆਂ ਹਨ ਅਤੇ ਨਾਲ ਹੀ ਹਥਿਆਰ ਤੇ ਨਕਦੀ ਵੀ ਬਰਾਮਦ ਕੀਤੀ ਹੈ। ਪੁਲਿਸ ਨੇ 2 ਆਸਟ੍ਰੇਲੀਆਈ ਨਾਗਰਿਕਾਂ ਦੀ ਗ੍ਰਿਫਤਾਰੀ ਵੀ ਕੀਤੀ ਹੈ, ਜੋ ਖਾਸਤੌਰ 'ਤੇ ਇਨ੍ਹਾਂ ਸਟੀਲ ਦੇ ਗਾਰਡਰਾਂ ਵਿੱਚੋਂ ਨਸ਼ੀਲਾ ਪਦਾਰਥ ਕੱਢਣ ਲਈ ਨਿਊਜੀਲੈਂਡ ਪੁੱਜੇ ਸਨ। ਇਸ ਨਸ਼ੀਲੇ ਪਦਾਰਥ ਦਾ ਮੁੱਲ ਕਈ ਮਿਲੀਅਨ ਡਾਲਰ ਦੱਸਿਆ ਜਾ ਰਿਹਾ ਹੈ ਤੇ ਇਸ ਤੋਂ ਕਰੀਬ 25.7 ਮਿਲੀਅਨ ਡੋਜ਼ ਬਣ ਸਕਦੀਆਂ ਸਨ, ਜਿਨ੍ਹਾਂ ਨੇ ਕਈਆਂ ਦੀਆਂ ਜਾਨਾਂ ਲੈਣੀਆਂ ਸਨ।